նախընտրելի դարձնել
Պաշտոնական այցով Չեխիայում գտնվող վարչապետ Հովիկ Աբրահամյանն այսօր հանդիպում է ունեցել Չեխիայի խորհրդարանի Պատգամավորների պալատի նախագահ Յան Համաչեկի հետ:
Ողջունելով Հովիկ Աբրահամյանին Չեխիայի խորհրդարանի Պատգամավորների պալատում՝ Յան Համաչեկն արձանագրել է երկկողմ հարաբերությունների բարձր մակարդակը եւ կարեւորել Հայաստանի վարչապետի պաշտոնական այցը Չեխիա` հայ-չեխական կապերն էլ ավելի խորացնելու եւ տնտեսական հարաբերություններն ակտիվացնելու առումով: Հայ-չեխական հարաբերությունների ամրապնդման եւ խորացման առումով բարձր է գնահատվել ՀՀ նախագահ Սերժ Սարգսյանի պետական այցը Չեխիա: Պատգամավորների պալատի նախագահը, կարեւորելով միջխորհրդարանական կապերի խորացումը, անհրաժեշտ է համարել համագործակցության հետագա զարգացումը նաեւ տնտեսության ոլորտում: Յան Համաչեկը կարեւոր է համարել փոխգործակցության խորացումն Արեւելյան գործընկերության շրջանակում:
Վարչապետ Հովիկ Աբրահամյանը գոհունակությամբ նշել է, որ վերջին տարիներին Հայաստանի եւ Չեխիայի միջեւ հարաբերությունները եւ քաղաքական երկխոսությունն ակտիվացել են, որոնք նշանավորվել են բարձրաստիճան տարբեր փոխայցելություններով եւ հանդիպումներով: Նա կարեւորել է խորհրդարանական դիվանագիտության դերը եւ հայ-չեխական միջխորհրդարանական համագործակցությունը:
Վարչապետ Աբրահամյանն անհրաժեշտ է համարել առեւտրատնտեսական կապերի հետագա ակտիվացումը եւ զարգացումը: Նա նշել է, որ Չեխիան հանդիսանում է Եվրոպայում Հայաստանի կարեւոր գործընկերներից մեկը եւ կարեւորել է Արեւելյան գործընկերության շրջանակում, ինչպես նաեւ ՀՀ-ԵՄ համագործակցության այլ ձեւաչափերում փոխգործակցության խորացումը:
Հովիկ Աբրահամյանը նշել է, որ հայկական կողմը բարձր է գնահատում Հայոց ցեղասպանության հարյուրամյա տարելիցի միջոցառումներին Չեխիայի Սենատի եւ Պատգամավորների պալատի պատվիրակության մասնակցությունը եւ շնորհակալություն հայտնել Պատգամավորների պալատի արտաքին հարաբերությունների հանձնաժողովին՝ Հայոց ցեղասպանության վերաբերյալ բանաձեւն ընդունելու համար:
Զրուցակիցներն անդրադարձել են Լեռնային Ղարաբաղի հիմնախնդրին եւ շեշտել, որ հակամարտությունը պետք է կարգավորվի ԵԱՀԿ Մինսկի խմբի շրջանակում, խաղաղ բանակցությունների արդյունքում:
Հանդիպման ընթացքում քննարկվել են նաեւ երկկողմ հետաքրքրություն ներկայացնող այլ հարցեր, երկուստեք կարեւորվել է միջազգային հարթակներում փոխգործակցությունը:
Հանդիպումից հետո վարչապետ Հովիկ Աբրահամյանի գլխավորած պատվիրակությունը Պրահայի Սենովաժնե հրապարակում ծաղկեպսակ է դրել հայ-չեխական բարեկամությունը խորհրդանշող խաչքարին:
