ԵԽԽՎ պատվիրակությունը, որը հետեւելու է Ադրբեջանում խորհրդարանական ընտրությունների նախապատրաստությանը, ժամանել է Բաքու:

Ինչպես հաղորդում է ԱՊԱ-ն, ԵԽԽՎ պատվիրակությունը բաղկացած է 5 անդամից, որը գլխավորում է իսպանացի պատվիրակ Յորդի Չուկլան: Պատվիրակությունը երկու օր կլինի Ադրբեջանում՝ ուսումնասիրելու նախընտրական իրավիճակը:

Այցի նպատակը Ադրբեջանի ընտրական համակարգը եւ նախընտրական քարոզարշավը գնահատելն է խորհրդարանական ընտրություններից առաջ, որը տեղի է ունենալու նոյեմբերի 1-ին:

Պատվիրակությունը հանդիպումներ կունենա  Ադրբեջանի խորհրդարանի նախագահի, խորհրդարանում ներկայացված կուսակցությունների ու խմբերի ղեկավարների հետ: Բացի այդ, հանդիպումներ են նախատեսված ԵԽԽՎ-ում Ադրբեջանի պատվիրակության անդամների, ԿԸՀ նախագահի, հասարակական կազմակերպությունների ու մամուլի ներկայացուցիչների հետ:

Պատվիրակությունը գրավոր հայտարարություն կպատրաստի իր այցի վերաբերյալ:

Պատվիրակության կազմում են նաեւ Ֆրանկ Շվաբեն (Գերմանիա), Ալեքսանդր Նիկոլսկին (Մակեդոնիա), Էլմեն Բաղըշը (Թուրքիա) եւ Ագուստին Կոնդեն (Իսպանիա):