նախընտրելի դարձնել
Սահմանադրական բարեփոխումների դեմ պայքարը համահայկական ազգային-ազատագրական շարժում է, որը պետք է տապալի ապօրինի իշխանությունը բոլոր մակարդակներում: Այս մասին այսօր` սեպտեմբերի 25-ին, Գյումրու թատերական հրապարակում «Ոչ»-ի ճակատի հրավիրած առաջին հանրահավաքին ասաց «Ժառանգություն» խմբակցության ղեկավար Զարուհի Փոստանջյանը: Նա նշեց, որ «Ոչ»-ի ճակատի քայլերը պետք է լինեն միասնական, շարժման ներքո չպետք է լինեն կուսակցական դրոշներ։
Ավելի վաղ հայտնել էինք, որ Գյումրու թատերական հրապարակում մեկնարկել է սահմանադրական բարեփոխումների դեմ հանդես եկող քաղաքական ուժերի ձեւավորած «Ոչ»-ի ճակատի առաջին հանրահավաքը:
Հանրահավաքից հետո տեղի է ունենալու երթ. մասնակիցներն Գյումրու մի շարք փողոցներով քայլելով հասնելու են քաղաքաի կենտրոնական հրապարակ՝ հնչեցնելով սահմանադրական փոփոխությունների դեմ պայքարելու կոչեր։ Ենթադրվում է, որ այսօր կհրապարակվի նաեւ Երեւանում կայանալիք հանրահավաքի օրը:
Գյումրիում են «Ժառանգություն» կուսակցությունից Րաֆֆի Հովհաննիսյանը, Զարուհի Փոստանջյանը, ՀԱԿ-ից Լեւոն Զուրաբյանը, Արամ Մանուկյանը, ՀԱԿ-ի երիտասարդ ակտիվիստներ, «Հիմնադիր խորհրդարանի» անդամներ, ԱԻՄ առաջնորդ Պարույր Հայրիկյանը: ԲՀԿ-ից դուրս եկած Տիգրան Ուրիխանյանի հիմնադրած «Ալյանս» կուսակցությունը նույնպես հայտարարել է, որ մասնակցելու է այսօրվա հանրահավաքին:
Հիշեցնենք, որ Սահմանադրության նոր նախագիծը, որով նախատեսվում է անցում կառավարման խորհրդարանական համակարգի, արդեն ուղարկվել է ԱԺ: Աշնանային նստաշրջանի առաջին քառօրյային սկսվել են նախագծի քննարկումները: Ըստ ԱԺ նախագահի՝ հանրաքվեն նախատեսվում է անցկացնել մինչեւ աշնան վերջ:
2015թ. սեպտեմբերի 12-ին տեղի ունեցած «Ոչ»-ի ճակատի առաջին համաժողովի արդյունքում ընդունված հռչակագրին միացել են Հայ ազգային կոնգրեսը, «Ժառանգությունը», ՀԺԿ-ն, ԱԻՄ-ը, «Հայազնը», Հիմնադիր խորհրդարանը, «Արմատ» ՀԿ-ն, ՀՀ Քաղաքագետների միությունը, «Մարտի 1» ՀԿ-ն, «Ազատություն եւ ժողովրդավարություն» ՀԿ-ն, «Ոչ թալանին» նախաձեռնությունը, այլ հասարակական եւ քաղաքական կազմակերպություններ:
