Եվս մի շինություն, որում Շվեդիայի իշխանությունները նախատեսում էին տեղավորել երկիր եկող փախստականներին, այրվել է անցած գիշեր, տեղեկացրել է   SVT հեռուստաալիքը: Ոստիկանությունը դիտավորյալ հրդեհում է կասկածում: Սա հոկտեմբերի սկզբից ի վեր արդեն յոթերորդ նման դեպքն է:

Այս անգամ այրվել է Շվեդիայի հարավ-արեւելյան Էսքիլսթուն քաղաքից  ոչ հեռու գտնվող Էռլա բնակավայրը:  Իշխանությունները նախատեսում էին այնտեղ փախստականների տեղավորել: Հրդեհի հետեւանքով ոչ ոք չի տուժել:  

Անցած գիշեր այրվել է նաեւ Շվեդիայի արեւմուտքում գտնվող Մունկեդալ բնակավայրի փախստականների ընդունման կետը:  Սա կենտրոնի հրդեհման երկրորդ դեպքն էր. ավելի վաղ՝ երեքշաբթի կրակը ոչնչացրել էր շինության կողաշենքը:  Ոստիկանությունը հետաքննում է այդ միջադեպերի միջեւ հնարավոր կապը, տեղեկացնում է ՏԱՍՍ-ը:  

Կիրակի գիշերն այրվել  է Շվեդիայի հարավ-արեւմուտքում գտնվող Կունգսբակա համայնքի նախկին դպրոցի շենքը, որում նախատեսված էր փախստականների ընդունել:  Դրանից օրեր առաջ արտակարգ պատահար է տեղի ունեցել Յունգբյու համայնքի նախկին դպրոցի շենքում, որտեղ եւս փախստականների ընդունման կետ պիտի բացվեր:   Ավելի վաղ մի բարաք էր այրվել Առլյովայում  (Սկոնե հարավային նահանգ), որում տեղի իշխանությունները առանց ծնողների Շվեդիա եկող անչափահաս ներգաղթյալների տեղավորման կենտրոն էին կազմակերպել:   

Այս հրդեհումների վերաբերյալ տեղեկությունների ֆոնին որոշ քաղաքապետարաններ հայտարարել են, որ հանրությանն այլեւս չեն տեղեկացնի, թե որտեղ են գտնվում փախստականների ընդունման կետերը: 

Միգրացիայի վարչության՝ հինգշաբթի օրը հրապարակած կանխատեսման համաձայն,   9,8 միլիոնանոց Շվեդիան 2015-2016-ին կարող է մինչեւ 360 հազար միգրանտ ընդունել: Դա ԵՄ-ի տարածքում մեկ շնչին ընկնող ամենաբարձր ցուցանիշն է: