նախընտրելի դարձնել
Կարճ ժամանակահատվածում լարվածությունը տարածաշրջանում լրջորեն աճել է՝ ուղղակիորեն սպառնալով ԼՂ եւ Հայաստանի սահմանամերձ շրջանների բնակչության անվտանգությանը։ Այդ մասին ասել է Հայաստանի նՆախագահ Սերժ Սարգսյանը Հարավային Կովկասի ու Վրաստանի ճգնաժամի հարցերով ԵՄ հատուկ ներկայացուցիչ Հերբերտ Զալբերի հետ հանդիպմանը:
Նախագահի մամուլի գրասենյակից NEWS.am-ին հայտնում են, թե նախագահը ողջունել է հյուրին եւ նրա առաքելության արդյունավետ իրականացման տեսանկյունից կարեւորել հաճախակի հանդիպումներն ու քննարկումները, որոնք մինչ այս, նախագահի գնահատմամբ, եղել են անկեղծ եւ բովանդակալից: Սերժ Սարգսյանն ընդգծել է, որ այսօր առավել քան երբեւէ, կարեւոր է Եվրոպական միության հավասարակշռված դիրքորոշման պահպանումը ԼՂ հիմնախնդրի լուծման հարցում, ինչպես նաեւ խնդրի համապարփակ կարգավորման համար բարենպաստ մթնոլորտ ստեղծելու հանձնառության իրականացումը։
Դեսպան Զալբերը կարեւորելով հիմնահարցի շուտափույթ խաղաղ կարգավորման անհրաժեշտությունը՝ հավաստիացրել է, որ Եվրոպական Միությունը հանձնառու է շարունակելու տարածաշրջանում իր հավասարակշռված քաղաքականությունը:
Հանրապետության նախագահն անդրադառնալով Հերբերտ Զալբերի հետ շուրջ չորս ամիս առաջ կայացած նախորդ հանդիպումից հետո իրավիճակին՝ նշել է, որ այդ կարճ ժամանակահատվածում լարվածությունը տարածաշրջանում լրջորեն աճել է՝ ուղղակիորեն սպառնալով ԼՂ եւ Հայաստանի սահմանամերձ շրջանների բնակչության անվտանգությանը:
Նախագահն ընդգծել է, որ Հայաստանը պատրաստ է շարունակել կառուցողական համագործակցությունը՝ ի նպաստ տարածաշրջանում խաղաղության, կայունության եւ անվտանգության պահպանման ու ամրապնդման:
Հյուրի խնդրանքով նախագահ Սերժ Սարգսյանը ներկայացրել է իր մոտեցումները ԼՂ հիմնախնդրի լուծման բանակցային գործընթացի վերջին զարգացումների վերաբերյալ: Սերժ Սարգսյանը կարեւորել է միջազգային հանրության եւ իրավասու միջազգային կառույցների ժամանակին ու հասցեական, այլ ոչ թե ընդհանրական հայտարարությունները հրադադարի խախտումների կապակցությամբ, ինչպես նաեւ որոշակի միջոցների ձեռնարկումը, որոնք կկանխեն հետագա որեւէ սադրանք:
Հանդիպմանը երկուստեք ընդգծվել է, որ ԼՂ հիմնախնդիրը ռազմական լուծում չունի, եւ այն կարող է լուծվել միայն կողմերի համար ընդունելի փոխզիջումների հիման վրա:
