Մոսկվայի քաղաքային դատարանը մինչեւ մայիսի վերջ երկարաձգել է քաղաքական գործիչ Բորիս Նեմցովի սպանության գործով անցնող հինգ մեղադրյալի կալանքի ժամկետը: Ինչպես հաղորդում է ՏԱՍՍ-ը, այդպիսով դատարանը բավարարել է քննության միջնորդությունը: 

«Դատարանը որոշում է կայացրել բավարարել քննության` Դադաեւի, Էսկերխանովի, Բախաեւի, Շ.Գ. Շուբաշովի եւ Ա. Գումաշովի նկատմամբ կալանքը որպես խափանման միջոց  մինչեւ մարտի 28-ը երկարաձգելու միջնորդությունը», - դատարանի որոշումն է հրապարակել դատավոր Սերգեյ Պոդպրիգորովը:  

Ինչպես հետեւում է քննության միջնորդությունից, մեղադրյալների մեղքը հաստատվում է վկաների ցուցմունքներով, փորձաքննությունների, խուզարկությունների արդյունքներով, կասկածյալների խոստովանական ցուցմունքներով: Դատախազը հավանություն է տվել քննության միջնորդությանը` նշելով, որ դատական գործով անցնող կասկածյալների համար խափանման միջոց ընտրելու հիմքերը ուժի մեջ են մնում: 

Զաուր Դադաեւը, որին քննությունը հանցագործության անմիջական կատարող է համարում, հայտնել է, որ համաձայն չէ իրեն  ձերբակալելու եւ կալանքի առնելու որոշմանը:   «Ինձ ծանոթանալու համար բերել են գործի առաջին հատորը, այնտեղ բազմաթիվ սխալներ կան, իսկ ինչքան սխալ կլինի բոլոր հատորներում», - նշել է նա: Նրա փաստաբան Շամսուդին Ցակաեւը նշել է, որ իր պաշտպանյալը մասնակցել է մարտական գործողությունների եւ պարգեւներ ունի: «Նա կյանքն է վտանգել այս պետության համար, նրան կալանքի մեջ պահելու անհրաժեշտություն չկա», - ասել է փաստաբանը:  Մնացած մեղադրյալների պաշտպանները եւ իրենք` մեղադրյալները եւս հանդես են եկել իրենց կալանքի ժամկետը երկարաձգելու որոշման  դեմ եւ ժխտում են հանցագործությանը իրենց հանցակցությունը: 

Այս գործի քննության ժամկետը երկարաձգվել է մինչեւ մայիսի  28-ը: Ավելի վաղ մեղադրյալների խափանման միջոցի հարցը քննարկել է Բասմանյան շրջանային դատարանը, սակայն մեղադրյալների կալանքի ժամկետի մեկ տարուց ավելի երկարաձգումն արդեն Մոսկովյան քաղաքային դատարանի իրավասությանն է պատկանում: