նախընտրելի դարձնել
Հայաստանի ԱԳ նախարար Էդվարդ Նալբանդյանը շարունակել է իր հանդիպումները Նյու-Յորքում մի շարք երկրների իր գործընկերների, ԵԱՀԿ Մինսկի խմբի համանախագահների հետ եւ մասնակցել ՀԱՊԿ արտգործնախարարների հանդիպմանը:
ՀՀ ԱԳՆ մամուլի ծառայությունից NEWS.am-ին հայտնում են, որ Է. Նալբանդյանը սեպտեմբերի 23-ին հանդիպել է Խորվաթիայի ԱԳ նախարար Գորդան Յանդրոկովիչի հետ եւ նրան է փոխանցել Խորվաթիայի նախագահ Իվո Յոսիպովիչին ուղղված ՀՀ նախագահ Սերժ Սարգսյանի ուղերձը:
Էդվարդ Նալբանդյանը հանդիպել է նաեւ Սլովենիայի արտգործնախարար Սամուել Զբոգարի հետ եւ քննարկել հաջորդ ամիս Սլովենիայի նախագահի Հայաստան կատարելիք պաշտոնական այցելության նախապատրաստական աշխատանքները:
Հունաստանի ԱԳ նախարար Դիմիտրիս Դրուցկասի հետ հանդիպման ընթացքում վերջինս տեղեկացրել է ֆինանսական ճգնաժամի հաղթահարման նպատակով իրականացվող աշխատանքները: Ընդունելով Հայաստան այցելելու հրավերը Դրուցկասը նշել է, որ Հայաստան կայցելի այս տարվա ընթացքում:
Էդվարդ Նալբանդյանը հանդիպում է ունեցել նաեւ Սիրիայի իր գործընկերոջ հետ:
Նույն օրը ՄԱԿ-ում ՌԴ մշտական ներկայացուցչությունում Էդվարդ Նալբանդյանը մասնակցել է ՀԱՊԿ անդամ երկրների արտգործնախարարների հանդիպմանը, որի ընթացքում անդրադարձ է կատարվել մեկ ամիս առաջ Հայաստանում ՀԱՊԿ ոչ պաշտոնական գագաթաժողովին կայացրած որոշումների իրականացման գործընթացը, քննարկվեցին կազմակերպության անդամ երկրների արտաքին քաղաքականության համադրման աշխատանքները:
Սեպտեմբերի 23-ի երեկոյան Էդվարդ Նալբանդյանը մասնակցել է ԱՄՆ Նախագահ Բարաք Օբամայի կողմից ՄԱԿ-ի Գլխավոր ասամբլեայի նստաշրջանին ժամանած պատվիրակությունների ղեկավարների պատվին տրված ընդունելությանը:
