նախընտրելի դարձնել
ՉԺՀ-ի դատարանը տղամարդուն մահապատժի է դատապարտել օտարերկրյա հետախուզությանը գաղտնի փաստաթղթեր վաճառելու համար, հայտնում է «Ինտերֆաքսը»` վկայակոչելով Չինաստանի կենտրոնական հեռուստատեսությանը:
Հեռուստառեպորտաժի համաձայն, Հուան Յույ անունով տղամարդը 1997-ից 2004-ին որպես տեխնիկական մասնագետ աշխատել է պետական գիտահետազոտական գաղտնագրային ինստիտուտներից մեկում:
2002-ին իր աշխատանքից ազատումից կարճ ժամանակ առաջ, նա ինքնուրույն կապվել է օտարերկրյա հետախուզություններից մեկի հետ, որի պետական պատկանելիությունը չի հաղորդվում` մտադիր լինելով նրան գաղտնի տեղեկություններ վաճառել:
Տղամարդը հատուկ ծառայությունների ներկայացուցիչներին ընդհանուր թվով 150 հազար նյութ է փոխանցել, որոնց թվում 90 փաստաթուղթ համարվել է «հատուկ կարեւորության» գաղտնի տեղեկություն, 292-ը կրել են «լիովին գաղտնի» մակագրությունը եւ գրեթե 1,7 հազար փաստաթուղթ եղել է «գաղտնի» աստիճանի: Այդ տարիներին նա ընդհանուր առմամբ մոտ 700 հազար դոլար է ստացել:
Հաղորդագրության մեջ ասվում է, որ փաստաթղթերի փոխանցումը «մեծ վնաս է հասցրել երկրի կուսակցական, քաղաքական, ռազմական եւ ֆինանսական գերատեսչությունների գաղտնագրված կապուղիների անվտանգությանը»:
Հուան Յունի բացահայտման հետ կապված` նրա նախկին աշխատավայրի առնվազն 29 պաշտոնատար անձ տարբեր տույժերի է արժանացել:
Չի հաղորդվում, թե արդյոք ի կատար է ածվել մահապատիժը:
