Քենիայի իշխանությունները նախատեսել են փակել երկրի տարածքում փախստականների բոլոր ճամբարները: Այդ մասին հայտնել է Քենիայի ԱԳՆ-ի ներկայացուցիչ Կարանջա Կիբիչոն: 

Իշխանությունների կարծիքով, ճամբարները բացասական ազդեցություն են ունենում երկրի տնտեսության եւ անվտանգության վրա: Երկրի ԱԳՆ-ում նշել են, որ փակման որոշումը գլխավորապես կապված է  Սոմալիից ապաստան խնդրողների հոսքի հետ, հայտնում է Deutsche Welle-ն:

Վերացվող ճամբարների թվում է, մասնավորապես, Դաադաբը Քենիայի արեւելյան հատվածում, որում   328 հազար մարդ է ապրում, հիմնականում Սոմալիից եկածներ, եւ Կակումեն` Հարավային Սուդանից   190 հազար փախստականներով:

Երկրի կառավարությունը նաեւ լուծարել է փախստականների հարցերի, մարդասիրական կազմակերպությունների հետ համագործակցության վարչությունը: 

Քենիան վերջին    25 տարվա ընթացքում փախստականներ է ընդունել հարեւան մի շարք երկրներից, որոնք բախվել էին ձգձգվող քաղաքացիական պատերազմների:   

Իրավապաշտպան կազմակերպությունները դատապարտել են քենիական իշխանությունների որոշումը, հայտնում է  Gazeta-ն: