Նախընտրելի
Եվրամիության եւ Թուրքիայի միջեւ վիզայի ռեժիմի ազատականացման մասին բանակցությունների շարունակումը հուսադրող գործոն է, հայտնել է Եվրահանձնաժողովի պաշտոնական ներկայացուցիչ Մարգարիտիս Սխինասը, հայտնում է «ՌԻԱ Նովոստին»:
Եվրահանձնաժողովը մայիսի սկզբին Եվրախորհրդարանին եւ ԵՄ-ի խորհրդին առաջարկել է հանել սահմանափակումները Թուրքիայի քաղաքացիների համար, եթե Անկարան մինչեւ հունիսի վերջ կատարի վիզաները հանելու համար մնացած պայմանները: Դրա թվում են կոռուպցիայի կանխարգելման միջոցները, Եվրապոլի (ԵՄ-ի ոստիկանական ծառայությունը) հետ օպերատիվ համաձայնության մասին բանակցությունների անցկացումը, բոլոր անդամ երկրների հետ դատական համագործակցությունը, ահաբեկչության դեմ պայքարում օրենսդրության վերանայումը:
«Այն փաստը, որ բանավեճերը շարունակվում են, ինքնին հուսադրող է», — Բրյուսելում լրագրողներին ասել է Սխինասը:
Ավելի վաղ Սլովակիայի արտգործնախարար Միրոսլավ Լայչակը հայտնել էր, որ իրատեսական չի թվում հունիսին նախատեսված` Եվրամիության վիզաների չեղյալ համարումը Թուրքիայի քաղաքացիների համար: Սլովակիան կնախագահի ԵՄ-ի նախարարների խորհրդում 2016-ի հուլիսից մինչեւ դեկտեմբեր:
Լայչակի խոսքով, անհրաժեշտ է, որ Թուրքիան կատարի ԵՄ-ի բոլոր 72 պահանջները, որոնցից դեռ կատարված չեն 7-ը, այդ թվում` հակաահաբեկչական օրենսդրության վերաբերյալ:
Թուրքիայի նախագահ Թայյիփ Էրդողանը ԵՄ-ին ավելի վաղ սպառնացել էր դուրս գալ միգրացիոն համաձայնագրից, եթե Եվրամիությունը այդ երկրի քաղաքացիներին առանց վիզայի ռեժիմ չտրամադրի: Էրդողանը նաեւ հայտնել էր, թե Թուրքիան չի վերանայի իր հակաահաբեկչական օրենսդրությունը եւ ԵՄ-ին մեղադրել էր երկերեսանիության համար: Ի պատասխան Եվրահանձնաժողովի նախագահ Ժան-Կլոդ Յունկերը Թուրքիայի իշխանություններին կոչ է արել հրաժարվել Եվրամիությանը բարձրագոչ հայտարարություններով վախեցնելուց վիզայի ռեժիմի ազատականացման բանակցություններին ցանկալի արդյունքի հասնելու համար:
