Գերմանիայի եւ Թուրքիայի միջեւ հարաբերությունները բավականաչափ ամուր են` դիմանալու տարակարծությանը: Այդ մասին հունիսի 3-ին լրագրողների հետ զրույցում հայտնել է Գերմանիայի կանցլերի մամուլի քարտուղար Շտեֆան Զիբերտը: 

Նա Գերմանիայի եւ Թուրքիայի միջեւ հարաբերությունները բնութագրել է որպես  «լայն եւ խորը»` նշելով միգրացիոն ճգնաժամի հարցով համագործակցության կարեւորությունը, հայտնում է France-Presse գործակալությունը:

Զիբերտն առանձնահատուկ նշել է այն փաստը, որ Գերմանիայում մոտ  3 մլն թուրք է ապրում` ընդգծելով, որ «նրանք կան եւ մնում են մեր երկրի մաս»:

«Մեր երկրի ժողովրդավարական մշակույթը ենթադրում է, որ կարող են գոյություն ունենալ շարունակվող վեճեր, սակայն դա նաեւ նշանակում է, որ տարբեր կարծիքները կարող են արտահայտվել խաղաղ եղանակով»,- հայտնել է նա:

Հիշեցնենք, որ Բունդեսթագի պատգամավորները հունիսի   2-ին հավանություն են տվել Հայոց ցեղասպանության ճանաչման մասին բանաձեւին: