Երեկ ԵԱՀԿ Մինսկի խմբի համանախագահները պետք է սկսեին ԼՂ հարակից տարածքներում փաստահավաք դաշտային առաքելությունը։  Բայց փաստահավաք խմբի անդամները, որոնց անունները թաքցվում են, տարածաշրջան չժամանեցին` կարդում ենք «Հայկական ժամանակ»-ի այսօրվա համարում:  Թերթի հարցին՝ որն է պատճառը, որ համանախագահները չեն եկել, ԼՂ ԱԳ նախարար Գեորգի Պետրոսյանը պատասխանել է. «Ուշ են գալու մի քիչ»։ Նախարարը նշել է նաեւ, որ թեեւ հայտնի է՝ ովքեր են լինելու փաստահավաք առաքելության կազմում, բայց անուններ չի տվել։  «Այն, ինչ կատարվում է, դեռ մինչեւ վերջ հստակ չէ»,– ասել է նա։ Իսկ երբ թերթը խնդրել է  կոնկրետացնել,  թե ինչը հստակ չէ, պաշտոնյան պատասխանել է. «Ես պարտավոր եմ ձեր հարցերին պատասխան տալ, դուք էլ հարցնո՞ւմ եք»,– եւ անջատել է  հեռախոսը։ ԼՂՀ ԱԳՆ խոսնակ Մարսել Պետրոսյանը խնդրել է  համանախագահներին հարցնել, թե որն է նրանց ուշացման պատճառը եւ ասել, թե իրենց դեռ ցուցակ չեն տվել, եւ ինքը չգիտի, թե ով է գալու ԼՂ։ Հարցին՝ իսկ երբ են գալու, Մ. Պետրոսյանը պատասխանել է. «Չգիտեմ, վաղը, մյուս օրը, էն մյուս օրը, քեֆը իրենցը չի՞, երբ ուզեն»։