Նախընտրելի
Մեծ Բրիտանիան մոտավորապես 2,3 մլրդ սթեռլինգ կծախսի ամերիկյան 50 Apache AH-64E մարտական ուղղաթիռ գնելու համար: Այդ մասին հայտնել է բրիտանական պաշտպանության նախարար Մայքլ Ֆելլոնը, հայտնում է «ՌԻԱ Նովոստին»:
«Այս պայմանագրի շնորհիվ բրիտանական բանակը սքանչելի ուղղաթիռներ կստանա, հարկատուների գումարներն իզուր չեն ծախսվի: Մեծ քանակությամբ ինքնաթիռների, նավերի գնման այս պայմանագիրը զինված ուժերի մարտունակության բարձրացման մեր պլանի մաս է կազմում: Այդ պլանը, որին աջակցում է մեծացված ռազմական բյուջեն, մեզ կօգնի դիմակայել նոր սպառնալիքների», — ասել է նախարարը` հայտնելով Ֆարնբորոյի ավիասալոնի շրջանակում կնքված պայմանագրի մասին:
Նրա խոսքով, Apache ուղղաթիռի նոր մոդիֆիկացիան, որը Բրիտանիայի սպառազինության մաս է կազմում, ի վիճակի է սպառազինության մեծ քանակություն կրել, այն բարելավված վառելիքային արդյունավետություն ունի, այդ ուղղաթիռը հնարավոր է կառավարել ավելի բարդ եղանակային պայմաններում եւ մարտական պայմաններում: Գնումը կիրականացվի Մեծ Բրիտանիայի Պաշտպանության նախարարության համապատասխան վարչության եւ ԱՄՆ-ի կառավարության միջեւ:
Նա նշել է, որ երկարաժամկետ հեռանկարում հույս ունի Մեծ Բրիտանիայում այդ ուղղաթիռների վերանորոգման եւ սպասարկման հզորություններ ստեղծել:
Բրիտանիայի համար առաջին նոր Apache-ները հոսքագծից կիջեցվեն 2020-ի սկզբին եւ ծառայությունը կսկսեն 2022-ին:
