նախընտրելի դարձնել
Հայաստանի Ազգային ժողովի խմբակցությունները նամակ են հղել միջազգային կառույցների ղեկավարներին, կապված Ադրբեջանական գերության մեջ, իբր, ինքնասպան եղած հայ հովիվ Մանվել Սարիբեկյանի դեպքի հետ:
Ստորեւ ներկայացնում ենք նամակի տեքստն ամբողջությամբ.
«ՄԱԿ-ի Գլխավոր քարտուղար Բան Կի Մունին
Եվրոպական խորհրդարանի նախագահ Էժի Բուզեկին
ԵԽԽՎ նախագահ Մեվլութ Չավուշօղլուին
ԵԱՀԿ ԽՎ նախագահ Պետրոս Էֆթիմիուին
Հոկտեմբերի 5-ին՝ գիշերվա ժամը 3-ին, Ադրբեջանում մահացել է Հայաստանի սահմանամերձ գոտուց առեւանգված քաղաքացիական անձ, հովիվ Մանվել Մամիկոնի Սարիբեկյանը: Հղում անելով Ադրբեջանի Պաշտպանության նախարարության եւ ռազմական դատախազության համատեղ հայտարարությանը՝ այդ երկրի լրատվամիջոցները նշում են, թե տեղի ունեցածը «ինքնասպանությունե է։ Մինչ այդ ադրբեջանական ԶԼՄ-ներով տարածվել էր մի տեսահոլովակ, որում պարզ երեւում են Մ.Սարիբեկյանի վրա առկա խոշտանգումների հետքերը:
Հայաստանի Հանրապետության Ազգային Ժողովի պատգամավորական խմբակցությունները խստորեն դատապարտում են Ադրբեջանի Հանրապետության իշխանությանը Մանվել Սարիբեկյանի մահվան կապակցությամբ եւ պահանջում են Ադրբեջանից` իր կողմից վավերացված Մարդու իրավունքների եվրոպական կոնվենցիայի 2-րդ եւ 3-րդ հոդվածի դրույթներին, Ժնեւյան կոնվենցիաների եւ ՄԱԿ-ի 1984թ. դեկտեմբերի 10-ին ընդունված` «Խոշտանգումների եւ այլ դաժան, անմարդկային կամ նվաստացնող վերաբերմունքի ու պատժի դեմ» Կոնվենցիային համապատասխան պատասխանատվության ենթարկել Մանվել Սարիբեկյանի մահվանը մեղսակից բոլոր պաշտոնատար անձանց:
Միեւնույն ժամանակ հաշվի առնելով այն հանգամանքը, որ Միջազգային Կարմիր Խաչի Կոմիտեն հանդիսանում է Ժնեւյան կոնվենցիայի եւ կից արձանագրությունների դրույթների պահպանության երաշխավորը, Ազգային Ժողովի պատգամավորական խմբակցությունները դատապարտում են Կարմիր Խաչի Միջազգային կոմիտեի Երեւանի եւ Բաքվի գրասենյակների անգործությունն ու պասիվությունը:
Ադրբեջանի կողմից բարձրաձայնվող ինքնասպանության պաշտոնական վարկածը, մեր կողմից գնահատվում է որպես պատասխանատվությունից խուսափելու եւ անպատժելիության կիրառման փորձ, քանի որ քաղաքացու մոտ նախքան մահն առկա են եղել բռնության հետքեր:
Ինքնասպանության վարկածի դեպքում անգամ ծագում է քաղաքացուն ինքնասպանության հակելու կամ հասցնելու վարկածը, ինչը պետք է մանրամասն քննության առնվի Ադրբեջանի Հանրապետության իրավասու մարմինների կողմից` անպայմանորեն գործընթացին մասնակից դարձնելով Հայաստանի Հանրապետության եւ միջազգային փորձագետներին:
Մարդու իրավունքների պաշտպանությանն առնչվող մի շարք միջազգային փաստաթղթեր վավերացրած Ադրբեջանի Հանրապետությունը պատասխանատու է իր երկրի վարչական սահմաններում գտնվող յուրաքանչյուր անձի անվտանգության համար: Օտարերկրյա քաղաքացու կյանքի դեմ ուղղված յուրաքանչյուր ոտնձգության բացահայտմանը պետք է մասնակից դարձվեն այն երկրի ներկայացուցիչները, որի հովանավորության ներքո գտնվում է տվայլ անձը:
Ուստի պահանջում ենք Հայասատանի Հանրապետության հովանավորությունը կրող Մանվել Սարիբեկյանի մահվան գործի քննությանը ներգրավել ՀՀ Իրավապահ մարմինների ներկայացուցիչներին եւ պատասխանատվության ենթարկել մեղավորներին:
Նաեւ կոչ ենք անում ԵԽԽՎ-ին, ԵԱՀԿ Խորհրդարանական վեհաժողովին, ՄԱԿ-ի եւ Եվրոպական Միության համապատասխան մարմիններին նպաստել այս դեպքի կապակցությամբ հետաքննությանը ներգրավելու Հայաստանի եւ միջազգային անկախ փորձագետներին»:
Նամակը ստորագրել են ՀՀԿ-ից` Գալուստ Սահակյանը, ԲՀԿ-ից` Գագիկ Ծառուկյանը, ՀՅԴ-ից` Վահան Հովհաննիսյանը, ՕԵԿ-ից` Հեղինե իշարյանը եւ «Ժառանգություն»-ից` Ստեփան Սաֆարյանը:
