ԱՄՆ-ի կողմից Թուրքիայի Ինջիրլիկ ավիաբազայում ամերիկյան միջուկային զենքի մշտական տեղակայումը ահաբեկչական եւ այլ թշնամական ուժերի կողմից գրավման լուրջ մտավախություններ է առաջացնում: Այդ մասին ասված է ամերիկյան հետազոտական Սթիմսոն կենտրոնի հրապարակած զեկույցում:  

Փորձագետները ենթադրում են, որ բացարձակ վստահություն չկա, թե ԱՄՆ-ն կկարողանա պահպանել B61 տեսակի հիսուն միջուկային ռումբերը Թուրքիայում շարունակվող քաղաքացիական հակամարտության  ֆոնին: 

Պետական հեղաշրջման անհաջող փորձի ընթացքում իշխանությունները սահմանափակեցին մուտքը ավիաբազա, իսկ դրա հրամանատարը ձերբակալվեց եւ մեղադրվեց հեղաշրջմանը մասնակցության համար:   

«Անվտանգության տեսանկյունից Ինջիրլիկի ավիաբազայում մոտավորապես  50 միավոր միջուկային զենք ունենալը նույնն է, ինչ զար նետելը», — նշված է զեկույցում:

Միացյալ Նահանգները Եվրոպայում առաջին անգամ մարտավարական միջուկային զենքեր են տեղակայել   1950-ականների վերջին եւ 1960-ականների սկզբին` հակազդելու  խորհրդային տանկային բանակի աճեցմանը, որն ընթանում էր Արեւելյան Եվրոպայում: Չնայած միջուկային մարտավարական զենքի մեծամասնությունը   1990-ականների սկզբին դուրս է բերվել Եվրոպայից, 180 մարտավարական B61 ռումբ մնում է Եվրոպայի վեց բազայում` Բելգիայում, Իտալիայում, Գերմանիայում, Նիդերլանդներում, ինչպես նաեւ Թուրքիայում: 

Զեկույցում խորհուրդ է տրվում անմիջապես բոլոր B61 ռումբերը հանել Եվրոպայից եւ վերացնել զենքի այդ տեսակի բոլոր գնումները, ինչն ավելի քան վեց միլիարդ դոլարի խնայողություն կտա:  «Այդ ռումբերը վատ են հարմարեցված ժամանակակից պատերազմի համար եւ աներեւակայելիորեն թանկ արժեն», — ընդգծված է փաստաթղթում:   

Թուրքիայում զինվորականների ապստամբությունը, որը տեղի էր ունեցել հուլիսի  15-ին, ճնշվել է իշխանությունների կողմից: Հեղաշրջման ընթացքում    246 մարդ զոհվել է, չհաշված հեղաշրջման կազմակերպման հետ կապ ունեցողներին, եվս   2,1 հազար մարդ վնասվածքներ է ստացել:

Իշխանության պետական հեղաշրջման կազմակերպման համար Թուրքիայում մեղադրել են իսլամական քարոզիչ Ֆեթհուլլա Գյուլենին, որն ԱՄՆ-ում է ապրում: Անկարան նրա անհապաղ արտահանձնում է պահանջել եւ Վաշինգտոնին սպառնացել է վատացնել հարաբերությունները, եթե հրաժարվեն հանձնել նրան: Ինքը` ընդդիմադիրը դատապարտել է ապստամբությունը եւ հայտնել է դրա հետ կապ չունենալու մասին, հայտնում է   Lenta-ն: