նախընտրելի դարձնելՄեքսիկական Միացյալ Նահանգների պատգամավորների պալատի Մեքսիկա-Հայաստան բարեկամության խմբի պատվիրակության անդամներ Բլանկա Մարգարիտա Կուատա Դոմինգեսը, Մարիա Կրիստինա Տերեսա Գարսիա Բրավոն, Կառլոս Էռնանդես Միրոն Հայաստանի Հանրապետության ԱԺ նախագահի տեղակալ Էդուարդ Շարմազանովի ուղեկցությամբ հոկտեմբերի 24-ին հյուրընկալվել են Արցախի Հանրապետության Ազգային ժողովում:
Արցախի ԱԺ-ից NEWS.am-ին հայտնում են, որ հյուրերին ընդունել է Ազգային ժողովի նախագահ Աշոտ Ղուլյանը, ով նշել է որ Արցախի Հանրապետությունը շահագրգռված է բարեկամական հարաբերություններ ունենալու տարբեր երկրների հետ: «Մեզ համար շատ ցանկալի է, որ առաջին ծանոթությունը հետագայում եւս իր շարունակությունն ունենա: Կարծում եմ՝ այս այցելությունը մեր հարաբերությունների համար շատ լավ սկիզբ է»,-ընդգծել է խորհրդարանի նախագահը:
Խոսելով Արցախի ժողովրդի պայքարի մասին՝ ՀՀ ԱԺ նախագահի տեղակալ էդուարդ Շարմազանովը անդրադարձել է Ադրբեջանի իշխանությունների վարած հակահայ քարոզչության եւ շփման գծում պարբերաբար հրահրվող ռազմական գործողությունների մասին:
«Արցախի ժողովրդի պայքարը Ադրբեջանի դեմ չէ, Արցախի ժողովրդի պայքարը իր ազատության եւ խաղաղության համար է»,-շեշտել է Էդուարդ Շարմազանովը:
Պատասխանելով մեքսիկացի խորհրդարանականների պատվիրակության ղեկավար Բլանկա Դոմինգեսի՝ Ադրբեջանի կողմից Արցախի ազատության սահմանափակման պատճառների մասին հարցին, Արցախի խորհրդարանի ղեկավարը նշել է, որ նաեւ խորհրդարանական կապերի միջոցով է հնարավոր միջազգային հարթակներում ներկայացնել Արցախը եւ արգելափակել Ադրբեջանի կողմից տարածվող հակահայկական մտացածին քարոզչությունը:
«Մեր այցը շատ լավ նախադեպ է մեքսիկացի պաշտոնյաների հետագա այցերի համար եւ մենք համագործակցելու ենք Ձեզ հետ, քանի որ կարծում ենք, որ ազատությունն ու մարդու իրավունքները ամեն ինչից վեր են»,- նշել է Բլանկա Դոմինգեսը:
Ընդգծելով հանդիպման կարեւորությունը՝ մեքսիկացի պատգամավոր Կառլոս Միրոն նշել է. «Շատ կարեւոր է, որ այսպիսի հանդիպումների ժամանակ մենք ձայն բարձրացնենք եւ կոչ անենք խաղաղության ու երկխոսության»:
Խորհրդարարանի նախագահը հյուրերին ներկայացրել է այն խնդիրները, որոնց Արցախը հանդիպում է աշխարհին ներկայանալու ճանապարհին: Խոսվել է նաեւ Արցախում պետականաշինության ընթացքի, խորհրդարանի կառուցվածքի եւ միջխորհրդարանական կապերի մասին:
Ամփոփելով հանդիպումը՝ խորհրդարանի նախագահը հույս է հայտնել, որ Մեքսիկայի հետ այսօր ձեւավորվող միջխորհրդարանական հարաբերություններն այսուհետ ավելի կխորանան: «Յուրաքանչյուր գործի սկիզբը դժվար է, բայց դուք ստանձնել եք այդ դժվարությունը, ուստի ընդունեք, որ հանձին Արցախի 150 000 բնակչության՝ դուք ունեք բարեկամ երկիր»,- ընդգծել է Աշոտ Ղուլյանը:
Հանդիպմանը մասնակցել են նաեւ ԱԺ նախագահի տեղակալ Վահրամ Բալայանը եւ արտաքին գործերի փոխնախարար Ֆելիքս Խաչատրյանը:
Խորհրդարանում նախատեսված հանդիպումների երկրորդ հատվածում Մեքսիկական Միացյալ Նահանգների պատգամավորների պալատի անդամները հանդիպել են ԱԺ խմբակցությունների ներկայացուցիչներին:
Ողջունելով հյուրերին՝ Արցախի Հանրապետության Ազգային ժողովի նախագահի տեղակալ Վահրամ Բալայանը կարեւորել է նման հանդիպումները եւ հույս հատնել, որ որպես աշխարհի հզոր երկրներից մեկը, Մեքսիկան ըմբռնումով կմոտենա Արցախի պայքարին եւ կաջակցի, որպեսզի այն նույնպես դառնա աշխարհի՝ իրավական տեսանկյունից ընդունված երկրներից մեկը:
Հանդիպման ընթացքում մեքսիկացի պատգամավորներն Արցախի խորհրդարանականներին են ներկայացրել Արցախում ստացած իրենց տպավորությունները, այնուհետեւ խոսել երկկողմ փոխհարաբերություններն ընդլայնելու հետագա քայլերի մասին:
«Մենք տեղյակ ենք ձեր խնդիրներին: Այսօր, ֆիզիկապես ներկա գտնվելով այստեղ՝ տեսնում ենք մեծ տարբերություն մեր պատկերացրած եւ իրական Արցախի միջեւ: Սա ավելի է պարտավորեցնում մեզ՝ ձեր ձայնը լսելի դարձնելու համար»,-նշել է Մարիա Կրիստինա Բրավոն:
Խոսելով Արցախի պատմության եւ մշակույթի մասին՝ Կառլոս Միրոն ներկայացրել է երկու երկրների մշակույթների նմանության իր դիտարկումը եւ այն հիմնարար համարել հետագա փոխգործակցության համար: «Թույլ տվեք մեզ մաս կազմել Արցախի պատմությանը»,- իր խոսքը եզրափակել է մեքսիկացի պատգամավորը:
«Մենք եւս փնտրում ենք իրական ազատություն եւ գիտենք՝ ինչ է նշանակում պայքարել ազատության համար»,- ընդգծել է Բլանկա Դոմինգեսը:
Խորհրդարանական խմբակցությունների ղեկավարները մեքսիկացի գործընկերների հետ հետագա համագործակցության պատրաստակամություն են հայտնել եւ այդ համատեքստում ուղենշել որոշ ոլորտներ:
Մինչ խորհրդարանում հանդիպումները, առավոտյան պատվիրակությունը այցելել է Ստեփանակերտի հուշահամալիր եւ ծաղիկներ խոնարհել ի հիշատակ Արցախյան պատերազմում զոհված ազատամարտիկների:
