նախընտրելի դարձնելԱրցախի Հանրապետության արտաքին քաղաքականության հիմքում բազմավեկտորությունն է եւ կոմպլեմենտարությունը: Այս մասին «Վոեննի դիպլոմատ» կայքին տված հարցազրույցում ասել է ԼՂՀ նախագահ Բակո Սահակյանը։
Նրա խոսքով՝ տվյալ մոտեցումը հանգում է նրան, որ Արցախը ձգտում է աշխարհի տերությունների եւ տարածաշրջանի երկրների հետ հավասար եւ բարիդրացիական հարաբերությունների զարգացման: «Այս մոտեցման առանցքային պատճառը շատ երկրներում հայկական Սփյուռքի առկայությունն է, հատկապես այն երկրներում, որոնք մեր տարածաշրջանում իրենց շահերն ունեն: Այս համատեքստում մենք պարզապես պարտավոր ենք բարեկամական հարաբերություններ զարգացնել այդպիսի երկրների հետ, ի դեպ՝ մի երկրի հետ կապերի զարգացումը երբեք չի լինում մյուսի հետ կապերի սառեցման հաշվին:
Ռուսաստանի հետ մեզ կապում են նաեւ բազմադարյա բարեկամությունը, մեր ժողովուրդների մշակույթի, ավանդույթների, պատմության շատ ընդհանրությունները, տնտեսական շահերը: Դրանից բացի, Ռուսաստանի Դաշնությունը ԵԱՀԿ Մինսկի խմբի երեք համանախագահող երկրներից մեկն է, որն էական ավանդ է բերում մեր տարածաշրջանում խաղաղության եւ անվտանգության պահպանման գործում: Ճիշտ է, հաշվի առնելով մեր պետության չճանաչված լինելը՝ Արցախի եւ Ռուսաստանի հարաբերությունները շոշափում են սոսկ հումանիտար հարթությունը: Մենք նաեւ բավականին սերտ հարաբերությոններ ունենք Ռուսաստանում հայկական Սփյուռքի հետ, որի բավականին մեծ հատվածը ծագումով Ղարաբաղից է:
Ինչ վերաբերում է մեր երկրի միջազգային իրավական սուբյեկտ լինելուն, ապա մենք այս ուղղությամբ ակտիվ աշխատանք ենք կատարում: Այսպես՝ վերջին մի քանի տարիներին Արցախի Հանրապետությունը ճանաչել են ԱՄՆ Մասաչուսեթս, Ռոդ Այլենդ, Մեն, Լուիզիանա, Քալիֆորնիա, Հավայի, Ջորջիա նահանգները, Ավստրալիայի Հարավային Ուելս նահանգը, Բասկերի երկիրը, ինչպես նաեւ ԱՄՆ-ի եւ Եվրոպայի մի շարք քաղաքներ, որոնցից ամենախոշորը Լոս Անջելեսն է:
Առաջիկա տարիներին մենք մտադիր ենք ընդլայնել մեր գործունեության աշխարհագրությունը, եւ հույս ունեմ, որ կհայտնվեն այլ երկրների քաղաքներ ու շրջաններ, որոնք մեր անկախությունը կճանաչեն: Բնականաբար, մենք հատուկ շեշտադրում կկատարենք առանձին պետությունների կողմից ճանաչման հասնելու վրա եւ կարծում ենք, որ սա զուտ ժամանակի եւ քրտնաջան աշխատանքի հարց է:
Ինչ վերաբերում է Ռուսաստանում եւ այլ երկրներում տարբեր կարգի միջոցառումների կազմակերպմանը, ապա մենք համանման ծրագրեր ունենք, որոնք դիտարկում ենք որպես ժողովուրդներ միջեւ կապերի զարգացման լավ հիմք»,- նշել է Բակո Սահակյանը:
