նախընտրելի դարձնելՀՀ գյուղատնտեսության նախարար Իգնատի Առաքելյանն այսօր՝ նոյեմբերի 17-ին, հյուրընկալել է գյուղատնտեսական կենդանիների արտահանմամբ եւ ներմուծմամբ զբաղվող ֆրանսիական առաջատար «Ժան Պոլ Բուայե» ընկերության ներկայացուցիչներին` անասնապահության ոլորտում համագործակցության հնարավորությունները քննարկելու նպատակով:
«Անասնապահությունը մեզ համար առաջնային նշանակություն ունի եւ այսօր զբաղեցնում է Հայաստանի գյուղատնտեսության շուրջ 50%-ը: Միեւնույն ժամանակ մենք դեռ մեծ դաշտ ունենք ներդրումներ կատարելու եւ զարգացնելու ոլորտը, ուստի բաց ենք ու պատրաստ քննարկել տարբեր առաջարկություններ»,-ողջունելով հյուրերին` մասնավորապես նշել է ՀՀ գյուղատնտեսության նախարարը:
Գյուղնախարարությունից NEWS.am-ին հայտնում են, որ Իգնատի Առաքելյանի առաջարկով կողմերը քննարկել են ՀՀ-ում տոհմաբուծարանների հիմնական պետական ծրագրի շրջանակում համագործակցության հնարավորությունները:
Ընկերության ղեկավար Ժան Պոլ Բուայեն նշել է, որ Հայաստանն անասնապահական առեւտրի համար բարենպաստ աշխարհագրական դիրք ունի, ինչպես նաեւ հրաշալի լեռնային արոտավայրեր, եւ իրենք հետաքրքրված են եւ ոգեւորված Հայաստանում ներդրումներ կատարել:
ՀՀ գյուղատնտեսության նախարարի հետ հանդիպումից հետո «Ժան Պոլ Բուայե» ընկերության ներկայացուցիչները ՀՀ գյուղատնտեսության նախարարությունում հանդիպել են նաեւ մի շարք անասնաբուծական ընկերությունների հետ եւ քննարկել համագործակցության հնարավորություններ:
