Սյունիքի մարզի եւ Հայ-կանադական առեւտրաարդյունաբերական պալատի ու  Կանադայի տեղեկատվայնացման միջազգային ակադեմիայի միջեւ այսօր՝ դեկտեմբերի 17-ին ստորագրվել է համագործակցության վերաբերյալ պայմանագիր:

Տարածքային կռավարման նախարարության մամուլի ծառայությունից NEWS.am-ին հայտնում են, որ փաստաղթուղթը ստորագրել են Սյունիքի մարզպետ Սուրեն Խաչատրյանը եւ պալատի տնօրենների խորհրդի նախագահ Ազատ Վարդանյանը:

Կողմերի միջեւ համագործակցությունն ուղղված է լինելու Սյունիքի մարզի զարգացմանը, մի շարք` կրթության, առողջապահության, զբոսաշրջության, լեռնահանքային ու վերամշակման ոլորտներում ծրագրերի իրականացմանը: 

Ըստ ստորագրված փաստաթղթի` պալատն աշխատանքներ է իրականացնելու ներդրումների ներգրավման, միջազգային ծրագրերի ֆինանսավորման կազմակերպման, Հայաստանում նախագծերի իրագործմանը կանադական առաջատար ընկերությունների եւ կազմակերպությունների ներգրավման ուղղությամբ:

Կանադայի տեղեկատվայնացման միջազգային ակադեմիան (այն ՄԱԿ-ի Գերագույն խորհրդատվական ստատուսի (ԷԿՈՍՈՍ) կազմում գործող ոչ կառավարական կազմակերպություն է)  նախատեսում է Հայաստանում գտնվող իր մասնաճյուղի միջոցով Սյունիքի մարզում ստեղծել լեռնահանքային եւ լեռնավերամշակման, կառավարման բնագավառների մասնագետների պատրաստման ու վերապատրաստման ուսումնական կենտրոն:

ՀՀ փոխվարչապետ, տարածքային կառավարման նախարար Արմեն Գեւորգյանը  ողջունել է փաստաթղթի ստորագրումը` նմանատիպ համագործակցությունները կարեւոր համարելով տարածքների համաչափ զարգացման տեսանկյունից: