նախընտրելի դարձնելԴեպի կատարելություն ճանապարհորդությունը Հայաստանի ՓՄՁ ԶԱԿ-ը սկսել էր այս տարվա փետրվարից: Նախաձեռնությունն իրականացվել է Հայաստանի ՓՄՁ ԶԱԿ-ի եւ Գերմանիայի միջազգային համագործակցության ընկերության (ԳՄՀԸ) կողմից ԵՄ աջակցությամբ իրականացվող «Աջակցություն ՓՄՁ զարգացմանը Հայաստանում» (SMEDA) ծրագրի համագործակցության շրջանակում:
Որակի կառավարման եվրոպական հիմնադրամի (EFQM) հիմնադրամի գնահատող փորձագետ Մաքսիմ-Անրի Լագրիերը Երեւանում ամփոփեց Հայաստանի ՓՄՁ ԶԱԿ-ի կենտրոնական գրասենյակի եւ մարզային մասնաճյուղերի աշխատակիցների անցած ճանապարհը, ներդրած ջանքերը կառավարման որակը բարելավելուն ուղղված 4 ծրագրի իրականացման հարցում:
«Շատ կարեւոր է, որ Հայաստանում որակի կառավարման սերտիֆիկատն առաջինը ստանում է ՓՄՁ ԶԱԿ-ը: Կարծում եմ՝ դա խթան կհանդիսանա ոչ միայն մյուս աջակցող կառույցների, այլեւ ՓՄՁ-ների համար, եւ նրանք նույնպես կսկսեն դեպի կատարելություն տանող ուղին, որն արդեն սկսել է ՓՄՁ ԶԱԿ-ը»,- ասաց Լագրիերը: Ըստ նրա՝ EFQM որակի կառավարման սերտիֆիկատ ունեն ոչ միայն եվրոպական աջակցող կառույցները եւ ՓՄՁ-ները, այլեւ Հին աշխարհամասի խոշորագույն կազմակերպությունները եւ կորպորացիաները:
Գնահատողն ամփոփիչ խոսքում նաեւ նշեց, որ այլ նման կազմակերպությունների ցուցանիշների հետ համեմատած՝ Հայաստանի ՓՄՁ ԶԱԿ-ն ունի միջինից զգալիորեն բարձր արդյունք: «Շատ գովելի էր, որ ՓՄՁ ԶԱԿ-ի երեւանյան գրասենյակի եւ մարզային մասնաճյուղերի աշխատակիցներն ակտիվորեն ներգրավված էին կատարելության ծրագրերում եւ սերտորեն համագործակցում էին գնահատման ժամանակ»,- շեշտեց բելգիացի Լագրիերը, որը Հայաստանում գտնվելու երկու օրերի ընթացքում արդեն հասցրել է սիրել հայկական գարեջուրը:
EFQM սերտիֆիկատ Կովկասում ստացել է միայն Վրաստանի կազմակերպություններից մեկը: Հայաստանի ՓՄՁ ԶԱԿ-ի գործադիր տնօրեն Լեւոն Մնացականյանի խոսքով՝ նման սերտիֆիկատը ենթադրում է Եվրոպայում ընդունված բարձրակարգ կառավարման համակարգի ներդրում: «Նման համակարգերի ներդրմամբ է պայմանավորված նաեւ փաստը, որ մենք 2016 թ.-ից սկսած՝ մոտ 80 ֆինանսավորված ՓՄՁ-ի դեպքում չունենք որեւէ ձախողված դեպք»,- շեշտեց Մնացականյանը: Ըստ նրա՝ կատարելության ճանապարհը երկար է, եւ ՓՄՁ ԶԱԿ-ն իր գործընկերների հետ արդեն սկսել է այդ ուղին: Հայաստանի ՓՄՁ ԶԱԿ-ի տնօրենի խոսքով՝ որպես առաջին արդյունք կարելի է համարել սերտիֆիկատի շնորհումը կենտրոնին:
«Ճանապարհ դեպի կատարելություն» ծրագրի ընթացքում մշակվել են նաեւ Հայաստանի ՓՄՁ ԶԱԿ-ի նոր տեսլականն ու առաքելությունը: Կենտրոնի նոր տեսլականն է՝ «Լինել փոքր եւ միջին ձեռնարկատիրության կայուն զարգացման ուղենիշը Հայաստանում՝ տրամադրելով համալիր եւ նպատակային աջակցություն»: Իսկ առաքելությունը սահմանվել է մի քանի նպատակներով՝ «Ապահովել ՓՄՁ ոլորտի աջակցության եւ զարգացման շարունակական բարեփոխումը», «Բարձրացնել ՓՄՁ-ների մրցունակությունը՝ առաջնորդվելով գիտելիքահեն տնտեսության սկզբունքներով», «Դառնալ վստահելի գործընկեր փոքր եւ միջին բիզնեսին հաջողության հասնելու իր ճանապարհին՝ տրամադրելով բարձրորակ գործարար լուծումներ եւ ծառայություններ»:
