Ժնեւի Տրեմբլե զբոսայգում հաջորդ ամիս հուշարձան կկանգնեցվի Հայոց ցեղասպանության զոհերի հիշատակին: Les réverbères de la mémoire հուշարձանի կանգնեցման աշխատանքներն արդեն մեկնարկել են, իսկ աշխատանքի հեղինակը ֆրանսիահայ քանդակագործ Մելիք Օհանյանն է:

Հուշարձանի տեղադրումը Ժնեւում տասնամյակ շարունակ վեճերի առարկա էր: Նախագծի գաղափարը ծնվել էր տասը տարի առաջ, սակայն հայ համայնքը թույլտվություն էր ստացել միայն անցյալ շաբաթ, հաղորդում է bluewin.ch- ը:

Շվեյցարիայի Ժողովրդական կուսակցության փաստաբան, խորհրդատու եւ պատգամավոր Իվ Նիդեգերը դիմում է ներկայացրել քաղաքային իշխանությունների որոշումը չեղյալ հայտարարելու համար: Նրա խոսքով՝ Տրեմբլեն կանաչ գոտի է, եւ այնտեղ ոչինչ չի կարելի կառուցել՝ բացառությամբ քաղաքացիների շահերից շենքերի կառուցումը եւ բացառապես այգու բարեկարգման նպատակով:

Նախագծի համակարգող Ստեֆան Քրիստինսենն իր հերթին նշում է, որ բոլոր դեմ հանդես եկողներն անում են դա քաղաքական դրդապատճառներից ելնելով: Նշվում է, որ 2014 թվականին նախագիծը պետք է իրականացվեր ժնևյան Արիանա զբոսայգում, սակայն մերժվել էր «միջազգային ասպարեզում Ժնեւի չեզոքության խախտման» պատրվակով, թեեւ իրականում որոշումը կայացվել էր թուրքական իշխանությունների ճնշման ներքո:

Ժնեւում կհայտնվի արդյոք Հայոց ցեղասպանության զոհերին նվիրված հուշարձան