Մեծ Բրիտանիայի 55-ամյա քաղաքացի Լալե Շահրավեշին սպառնում է երկու տարվա ազատազրկում այն բանի համար, որ իր հանգուցյալ նախկին ամուսնու կնոջը «ձի» է անվանել՝ հայտնում է BBC News-ը։

Նշվում է, որ Շահրավեշը Facebook-ում վիրավորական մեկնաբանություններ է գրել ԱՄԷ-ի քաղաքացի հանդիսացող իր նախկին ամուսնու հարսանեկան լուսանկարների տակ։

«Անիծվե՛ս դու։ Ինձ լքեցիր հանուն այս ձիու»,- գրել է Շահրավեշը, որը 18 տարի ապրել է ամուսնու հետ։

Կնոջը կալանավորել են Դուբայի օդանավակայանում, երբ պատրաստվում էր մեկնել նախկին ամուսնու թաղմանը։

Նշվում է, որ ազատազրկման այլընտրանքը կարող է լինել 50 000 ֆունտի տուգանքը։

Շահրավեշը հանգուցյալ ամուսնուց դուստր ունի։

Կնոջ շահերը պաշտպանում է «Դուբայում կալանավորվածներ» ընկերությունը։