Ապրիլի 10–ի լույս 11–ի գիշերը ջրագծի խոշոր վթար է տեղի ունեցել Արաբկիրում։ «Վեոլիա Ջուրը» պարզել է, որը վթարը տեղի է ունեցել մոտակայքում ընթացող շինարարական աշխատանքների հետևանքով։

Ընկերության տարածած հաղորդագրությունը ստորև ներկայացնում ենք ամբողջությամբ։

«Այսօր գիշերը, ժամը մոտ 3-ին, «Վեոլիա ջրում» ահազանգ էր ստացվել, որ Արաբկիրի Բաբայան փողոցում վթարվել է 500 մմ տրամագծով տարանցիկ խողովակաշարը, որը սնուցում է Արաբկիր ու Կենտրոն վարչական շրջանների մի շարք թաղամասեր:

Ահազանգի հետքերով` անմիջապես գնացել էր «Վեոլիա Ջրի» «Արաբկիր» տեղամասի պետը՝ անձամբ վթարը զննելու ու հրատապ միջոցներ ձեռնարկելու համար: Իսկ վաղ առավոտյան արդեն տեղում էր վթարայինի բրիգադը՝ տեխնիկայով հանդերձ:

Անգամ ոչ մասնագետի հայացքը կարող էր անմիջապես նկատել, որ վթարի պատճառը ջրատարից ընդամենը մեկ-երկու մետր այն կողմ ընթացող շինարարական աշխատանքներն են: Արդյոք հողահատակցումն այստեղ օրինական հիմքերո՞վ է իրականացվել: Սա մի հարց է, որ դեռ պետք է պարզել: Իր հերթին, շինհրապարակում չեն պահպանվել ջրագծի անվտանգության տարրական կանոնները: Ի դեպ, «Վեոլիա Ջուրը» բազմիցս զգուշացրել է կապալառուին, որ տարվող աշխատանքները կարող են հանգեցնել ջրագծի վթարի: Ի վերջո, այդպես էլ եղավ:

Շինարարների անփութության արդյունքում ջրատարը զրկվել էր իրեն պահող հողային հիմքից և կախվել օդում: Ջրագծով հոսող ջրի ծանրությունն էլ պատճառ էր դարձել, որ այն ճկվի և վթարվի:

Ներկայումս վթարի վայրում ընթանում են ինտենսիվ աշխատանքներ: Անշուշտ խողովակաշարի շահագործումն այսօր կվերսկսվի, սակայն ջրամատակարարման գրաֆիկի լիարժեք վերականգնումը հեշտ գործ չի: Մի քանի տասնյակ հազար խորանարդ մետր ջուր է պետք մղել ներքաղաքային բաշխիչ ցանց, ամենուր ապահովել համապատասխան ճնշում, անհրաժեշտության դեպքում էլ գտնել ու վերացնել խողովակաշարում երբեմն կուտակվող օդը:

Նման խոշոր վթարները միշտ էլ լրացուցիչ տեխնիկական խնդիրներ են առաջացնում ջրամատակարարման համակարգում: Դրա համար էլ «Վեոլիա ջուրը» հորդորում է բոլոր տնտեսվարողներին աշխատանքներն իրականացնել օրենդրությանը համապատասխան: Այլապես ... Վեոլիա Ջրի իրավաբանական վարչության աշխատակիցները արդեն զբաղվում են շինկազմակերպության աշխատանքների պատճառով առաջացած վթարի ծախսերը փոխհատուցելու խնդրով»։