նախընտրելի դարձնելՀայաստանի Գիտությունների ազգային ակադեմիայում ապրիլի 29-ին, անցկացվել է «Սեւանա լիճ. ներկա վիճակը, ընթացիկ հետազոտության արդյունքները եւ հետագա հետազոտության կարիքները» թեմայով միջազգային աշխատաժողով:
ՀՀ ԳԱԱ Տեղեկատվական-վերլուծական ծառայությունից NEWS.am-ին հայտնում են, որ հայ եւ գերմանացի մասնագետները ներկայացրեցին «SevaMod» ծրագրի` Սեւանա լճի բնական պաշարների կայուն կառավարման եւ օգտագործման համար ստեղծվող մոդելի առաջին փուլի արդյունքները, քննարկեցին ծրագրի հետագա շարունակման հնարավորությունները:
Աշխատաժողովը բացեց Գերմանիայի Մագդեբուրգի Շրջակա միջավայրի հետազոտության Հելմհոլցի կենտրոնի լճային հետազոտությունների բաժնի գիտնական Մարտին Շուլցեն, ով ներկայացրեց ծրագրի նպատակները, գործընկերներին եւ աջակիցներին:
Սեւանա լիճն աշխարհի քաղցրահամ ջուր ունեցող ամենաբարձրադիր լճերից մեկն է: Սակավաջուր մեր երկրի կյանքում մեծ է Սեւանի նշանակությունը: Նրա հետազոտությունները կարեւոր նշանակություն կունենան էկոհամակարգի բարելավման համար, նշեցին աշխատաժողովի մասնակիցները:
Աշխատաժողովի ընթացքում ներկայացվեցին «Սեւանա լճի էկոլոգիան», «Սեւանա լճի ավազանում հիդրոկլիմայական բնութագրերի փոփոխությունները», «Ֆոսֆորը Սեւանա լճի հատակային նստվածքներում», «Սեւանա լճի այժմյա եւ հետագա ստրատիֆիկացիայի մոդելավորում» եւ այլ զեկուցումներ:
Աշխատաժողովին մասնակցում էին ՀՀ ԳԱԱ փոխնախագահ ակադեմիկոս Յուրի Շուքուրյանը, ՀՀ ԳԱԱ Սեւանա լճի պահպանության փորձագիտական հանձնաժողովի նախագահ Յուրի Ջավադյանը, ՀՀ ԳԱԱ կենդանաբանության եւ հիդրոէկոլոգիայի գիտական կենտրոնի տնօրեն Բարդուխ Գաբրիելյանը, ՀՀ վարչապետի գլխավոր խորհրդական Արամ Ղարիբյանը, ՀՀ բնապահպանության նախարարի տեղակալ Այսեր Ղազարյանը, Գերմանիայի Մագդեբուրգ քաղաքի Շրջակա միջավայրի հետազոտության Հելմհոլցի կենտրոնի լճային հետազոտությունների բաժնի ղեկավար Կ. Ռինկեն, ՀՀ էներգետիկ ենթակառուցվածքների եւ բնական պաշարների նախարարության Ջրային կոմիտեի նախագահ Վարդան Մելքոնյանը, ՀՀ ԳԱԱ գիտահետազոտական կառույցների ղեկավարներ, գիտնականներ Հայաստանից, Գերմանիայից, Ռուսաստանից, ՀՀ պետական պատասխանատու մարմինների ներկայացուցիչներ:
Աշխատաժողովը կազմակերպել էին ՀՀ ԳԱԱ կենդանաբանության եւ հիդրոէկոլոգիայի գիտական կենտրոնը, Գերմանիայի Մագդեբուրգ քաղաքի Շրջակա միջավայրի հետազոտության Հելմհոլցի կենտրոնը (UFZ) եւ ՀՀ բնապահպանության նախարարության շրջակա միջավայրի մոնիթորինգի եւ տեղեկատվության կենտրոնը: Աշխատաժողովն անցկացվեց Գերմանիայի կրթության եւ հետազոտության դաշնային նախարարության (BMBF) կողմից ֆինանսավորվող «Սեւանա լճի մոդելի մշակում նրա էկոլոգիայի ավելի լավ ըմբռնման համար եւ որպես նրա բնական պաշարների կայուն կառավարման եւ օգտագործման գործիք» թեմայով գիտահետազոտական ծրագրի շրջանակներում:
