Նյու Յորքում գրեթե հարյուր ոստիկան վարակվել է կորոնավիրուսով: Այս մասին մամուլի ասուլիսին հայտնել է Նյու Յորքի ոստիկանապետ Դերմոտ Շին, փոխանցում է «ՌԻԱ Նովոստի»-ն: Ըստ նրա` 98 վարակվածներից 95-ը բուժվում են տնային պայմաններում:

Այժմ քաղաքային ոստիկանությունը, բացի սովորական պարտականությունները կատարելուց, նաեւ հետեւում է, որպեսզի փողոցներում մարդկանց կուտակումներ չլինեն` վիրուսի տարածումը կանխելու համար:

Ընդհանուր առմամբ, Նյու Յորքում հայտնաբերվել է կորոնավիրուսով վարակման 9045 դեպք, մահացել է 63 մարդ: Քաղաքապետ Բիլ դե Բլազիոյի խոսքով` քաղաքում վարակվածների թիվն ԱՄՆ-ում գրանցված բոլոր դեպքերի գրեթե մեկ երրորդն է կազմում:

ԱՄՆ-ն կորոնավիրուսով վարակվածների թվով երրորդ (ավելի քան 33 հազար) տեղում է աշխարհում` Չինաստանից (ավելի քան 81 հազար) եւ Իտալիայից (ավելի քան 59 հազար) հետո: