նախընտրելի դարձնել«Ռուսաստանի օրն ինձ, ինչպես նաեւ, վստահ եմ, իմ բոլոր հայենակիցների համար այն քիչ տոներից է, երբ քեզ զգում ես մեծ եւ ուժեղ երկրի մաս, որն ունի հարուստ պատմություն, մշակույթ, գիտություն», - հայտարարել է Հայաստանում Ռուսաստանի դեսպան Վյաչեսլավ Կովալենկոն` «Նոեվ կովչեգ» թերթին տված հարցազրույցում:
«Ինձ համար պատիվ է ռուս լինելը, եւ ես կցանկանայի Ռուսաստանի ու Հայաստանի ժողովրդին հայրենիքի նկատմամբ սեր մաղթել: Քանի որ մեր երկրները հենց մենք ենք: Որքան մենք լավ ենք վերաբերում մեր հայրենիքին, որքան շատ բան ենք անում հանուն երկրի զարգացման, այնքան ինքներս ավելի լավ ենք ապրում: Օգտվելով առիթից` կցանկանայի Հայաստանում եւ Ռուսաստանում իմ բոլոր բարեկամներին, իսկ նրանք շատ են, մաղթել երջանկություն, առողջություն, կապույտ երկինք, եւ թող նրանց տան օջախը միշտ վառ մնա» - ասել է դեսպանը:
Հարցին, թե տարբերվո՞ւմ է Հայաստանում Ռուսաստանի դեսպանատան աշխատանքի ոճը Վրաստանում Ռուսաստանի դեսպանատան աշխատանքից, դիվանագետը պատասխանել է. «Պայմանները տարբեր են: Ինձ համար դժվար էր լքել Թբիլիսին Հարավային Օսիայի նկատմամբ Սահակաշվիլիի ռեժիմի ագրեսիայի արդյունքում: Ինձ երկար ժամանակ հանգիստ չէր տալիս ռազմական գործողությունները թույլ չտալու չիրականացված պարտքի զգացումը: Ներքին վիճակը հնարավոր եղավ հաղթահարել, երբ ես նշանակում ստացա Հայաստանում: Այստեղ ես հայտնվեցի բոլորովին այլ` ուշադրության, բարյացակամ վերաբերմունքի մթնոլորտում: Հասկանալի է, որ այս ամենն իր ազդեցությունն է ունենում կոլեկտիվի աշխատանքի վրա: Այդ հարցում իմ բախտը միշտ բերել է»:
