նախընտրելի դարձնել
ՀՀ կենտրոնական բանկի գործողությունները դրամի արժեզրկման պայմաններում անընդունելի են, քանի որ Կենտրոնական բանկը դոլար շուկա դուրս բերելու փոխարեն, դրամ է դուրս բերում: Այս մասին հունիսի 2-ին լրագրողներին ասաց Հայաստանի հանրապետական կուսակցության գործադիր մարմնի անդամ Գագիկ Մինասյանը:
Նրա խոսքով՝ ապագայում դա տնտեսության զարգացման դանդաղեցման կհանգեցնի: Նա նշեց, որ երեք տարի առաջ գործող ղեկավարները փորձեցին խաբել ժողովրդին եւ բռնազավթեցին իշխանությունը՝ վկայակոչելով կոռուպցիան, սակայն Հայաստանում կոռուպցիայի մակարդակն այժմ շատ ավելի բարձր է:
Մինասյանը նշեց, որ նման միտման մասին է վկայում բոլոր «գունավոր հեղափոխությունների» փորձը: «Հայաստանի Հաշվեքննիչ պալատի հաշվետվությունից պարզ դարձավ, որ պետական գնումների 40 տոկոսն իրականացվում է մեկ անձից: Բացի այդ, դեպքերի կեսում չի գործում ներքին աուդիտը, որը պետք է ուղղված լիներ կոռուպցիայի առաջնային կանխարգելմանը: Եթե նախկինում տնտեսության մեջ «ստվերը» ներառական էր, ապա այժմ այն օգտագործվում է միայն իշխող վերնախավի կողմից: Այսինքն ՝ «ստվերը» ոչ թե քչացավ, այլ վերածվեց կոռուպցիայի, որն արտահայտվեց նաեւ պատերազմի ընթացքում՝ անորակ զենքի ու տեխնիկայի մատակարարման առումով: Այս իշխանությունները ոչ միայն չեն սիրում, այլեւ ատում են հայ ժողովրդին, ինչի մասին վկայում է նրանց անմարդկային վերաբերմունքը մեր հերոսների աճյունների նկատմամբ»,- հավելեց նա:
Քաղաքական գործիչը համոզմունք հայտնեց, որ «Պատիվ ունեմ» դաշինքը բավարար թվով ձայներ կհավաքի՝ նոր Կառավարությանն իր նպատակներին հասնելու գործում սատարելու համար:
Նա պարզաբանեց, որ նոր կառավարությունը պետք է հիմնված լինի երեք սկզբունքների վրա՝ կայունություն, կանխատեսելիություն եւ կառավարելիություն:
«Մի քանի ամսում հնարավոր է կայունացնել իրավիճակը եւ արագ անցնել երկրի զարգացմանն ուղղված նախագծերի իրականացմանը»,- եզրափակեց Գագիկ Մինասյանը:
