նախընտրելի դարձնել
Դիլիջանի Մոնթե Մելքոնյանի անվան ռազմամարզական վարժարանի ակումբում տեղի ունեցավ վիճակահանություն, որին որոշվեց 2021 թվականի Միջազգային բանակային խաղերի «Խաղաղության մարտիկ» մրցույթի միջազգային փուլին թիմերի ելույթների հաջորդականությունը: Այս մասին հայտնում է Միջազգային բանակային խաղերի մամուլի կենտրոնը:
Վիճակահանության համաձայն` մրցույթի առաջին` «Կավալեր» փուլում գրական-գեղարվեստական եւ պարային պատրաստվածության առաջադրանքը կսկսի կատարել Հայաստանի պաշտպանության նախարարության թիմը: Դրանից հետո իրենց ելույթը կշարունակեն մասնակիցները Բելառուսի Հանրապետությունից: Ղազախստանի եւ Ռուսաստանի Դաշնության թիմերն առաջադրանքները կկատարեն համապատասխանաբար երրորդը եւ չորրորդը: Հունաստանի հավաքականը կավարտի առաջին մրցութային օրվա ծրագիրը: Մրցույթի հաջորդ փուլերը կանցկացվեն թիմերի կողմից նույն հերթականությամբ:
Զինվորական անձնակազմի մասնագիտական հմտությունների մրցույթին մասնակցում են 6 երկրների թիմեր՝ Ռուսաստան, Հայաստան, Ղազախստան, Բելառուս, Հունաստան, եւ առաջին անգամ մասնակցում է Կատարի հավաքականը: Յուրաքանչյուր թիմ ներկայացված է 4 զինծառայողով, այդ թվում` մեկ աղջիկ:
Մրցութային ծրագիրը կանցկացվի 8 օր: Մրցույթի ընթացքում մասնակիցներն «Էրուդիտ» կոչվող փուլում կբացահայտեն ռազմական պատմության եւ միջազգային հումանիտար իրավունքի իմացությամբ լավագույններին: Ուժի, արագության, տոկունության, ճշգրտության եւ կողմնորոշման հմտություններով կմրցեն «Մարզիկ», «Դիպուկահար» եւ «Պրոֆեսիոնալ» փուլերում: Ամենաստեղծարարներին կպարզեն «Կավալեր» գրական-գեղարվեստական եւ պարային փուլում:
Բացի այդ, մշակութաժամանցային միջոցառումների ընթացքում բոլոր պատվիրակությունների համար կկազմակերպվեն մշակութային ծրագրեր եւ այցելություններ Հայաստանի պատմական տեսարժան վայրեր:
Սեպտեմբերի 1-ին տեղի կունենա մրցույթի բոլոր փուլերի արդյունքներով հաղթողների պարգեւատրման արարողությունը:
