նախընտրելի դարձնել
Հայաստանի իշխանություններն առաջարկում են երկրում սահմանափակել կանխիկ գործարքները՝ դրանց վերին շեմ սահմանելով 300 հազար դրամը։ Այս մասին Ազգային ժողովի նիստում, «Անկանխիկ վճարումների մասին» օրինագծի փաթեթի քննարկման ընթացքում, նոյեմբերի 16-ին ասաց ՀՀ ԿԲ փոխնախագահ Վախթանգ Աբրահամյանը։
ԿԲ ներկայացուցչի խոսքով՝ ֆիզիկական անձանց կողմից կատարվող կանխիկ գործարքների վերին շեմը առաջարկվում է սահմանել 300 հազար դրամի մակարդակում։ Ընդ որում՝ այդ գումարը գերազանցող բոլոր գործարքները պետք է իրականացվեն անկանխիկ։ «Մի շարք ոլորտներում ընդհանրապես կարգելվի օգտվել կանխիկից։ Դա, մասնավորապես, վերաբերում է բյուջե եւ բյուջեից վճարումներին, ինչպես նաեւ այնպիսի ոլորտներին, ինչպիսին են առողջապահությունը եւ կրթությունը»,- պարզաբանել է Աբրահամյանը։
Նա նաեւ նշել է, որ 300 հազար դրամ թիվն ընտրվել է ոչ պատահականորեն։ «2020թ. հսկիչ-դրամարկղային կտրոնների 99 տոկոսը տրվել է շատ ավելի քիչ գումարով։ Ընդ որում՝ փոփոխությունները կներդրվեն աստիճանաբար։ 2022թ. դրանք ուժի մեջ կմտնեն Երեւանում, 2023թ.՝ տարբեր մարզերի վարչական կենտրոններում, իսկ 2024թ. հունվարի 1-ից՝ Հայաստանի ամբողջ տարածքում»,- ասաց Կենտրոնական բանկի փոխնախագահը։
Վախթանգ Աբրահամյանը համոզված է, որ պետությունը պետք է ապահովի անհրաժեշտ ենթակառուցվածքը, որպեսզի յուրաքանչյուր քաղաքացի հնարավորություն ունենա անկանխիկ վճարել ապրանքի կամ ծառայության համար։ «Եվ տնտսուբյեկտը չպետք է նրան մերժելու իրավունք ունենա»,- ընդգծեց ԿԲ ներկայացուցիչը։
