նախընտրելի դարձնել
Բանկիրը 4 տարվա ազատազրկման է դատապարտվել՝ ստրիպտիզ ակումբներում եւ Tinder-ի ժամադրություններում ավելի քան 217 000 դոլար ծախսելու համար։
Raiffeisen Bank-ի նախկին գործադիր տնօրեն, 65-ամյա Պյերին Վինչենցը նաեւ 840 000 շվեյցարական ֆրանկի (900 600 դոլար) տուգանքի է ենթարկվել եւ պարտավոր է մոտ 1,6 միլիոն ֆրանկ վճարել այն ընկերություններին, որոնք տուժել են նրա խարդախություններից:
Գերմանական Süddeutsche Zeitung թերթը հայտնում է, որ Վինչենցը մեղավոր է ճանաչվել մի շարք մեղադրանքներով, ներառյալ խարդախությունը, վատնումները եւ փաստաթղթերի կեղծումը՝ մի շարք անօրինական գործարքների շրջանակներում, որոնք նրան միլիոններ են բերել:
Ըստ The Sunday Times-ի՝ Վինչենցին մեղադրել են իր ընկերության վարկային քարտն օգտագործելու համար, որպեսզի ֆինանսավորի այն, ինչ դատախազն անվանել է «կարմիր լապտերների գոտիներով 20-ամյա շրջագայություն»:
Ամենաուշագրավը եղել է 217 675 դոլարը, որը վճարվել է ստրիպ-ակումբներին եւ բուրլեսկ-բարերին, հաղորդում է Daily Beast-ը: Վինչենցը մոտ 97 000 դոլար ծախսել է միայն բուրլեսկ կաբարեների վրա, որը նա հանել է իր Raiffeisen ընկերության քարտից։
BBC-ն ավելի վաղ հայտնել էր, որ Վինչենցը 700 ֆրանկ (749 370 դոլար) է ծախսել ընթրիքի վրա մի կնոջ հետ, որի հետ նա Tinder-ում է ծանոթացել, եւ որը անվանել է «աշխատանքի ընդունելու համար հարցազրույց»:
The Times-ը գրում է, որ Վինչենցը մոտ 250 000 շվեյցարական ֆրանկ է պահանջել մասնավոր ինքնաթիռների եւ Մայորկայում, Տեներիֆեում եւ Դուբայում ընտանեկան հանգստի համար: Վինչենցը հիմնավորել է ծախսերը՝ ասելով, որ դրանք անհրաժեշտ են միջազգային բանկերի հետ կապեր պահպանելու համար, գրում է գերմանական Tagesschau-ն։
Դատավարության ընթացքում նա ընդունել է «սխալները»՝ կապված իր կորպորատիվ ծախսերի հետ։ Թերթը գրում է, որ նման սխալներից մեկն այն է, որ նա ավելի քան 5000 դոլար է ծախսել իր ընկերության վարկային քարտից, որպեսզի վերանորոգի Ցյուրիխի հյուրանոցի սենյակը, որը վնասվել է, ինչպես դատախազներն են ասել, մերկապարուհու հետ «բուռն վեճի» պատճառով:
Reuters-ը հայտնում է, որ դատավոր Սեբաստիան Էփլին, որը դատապարտել է Վինչենցին, ասել է, որ «(նրա) ըմբռնումը, թե գործնականում բոլոր ծախսերը ընկնում են ընկերության մեկանգամյա ծախսերի տակ, քանի որ որեւէ հեռավոր կապ կա բիզնես գործունեության հետ, ակնհայտորեն չափազանց հեռուն է գնացել»:
