«Ի՞նչ, որտե՞ղ, ե՞րբ» ինտելեկտուալ հեռուստախաղի նախկին մասնակից Ռովշան Ասկերովը մեղադրյալ է դարձել  նացիզմի ռեաբիլիտացման մասին քրեական գործով Մարշալ Գեորգի Ժուկովի մասին ֆեյսբուքյան գրառումից հետո, հայտնում է «Ինտերֆաքս»-ը՝ վկայակոչելով ՌԴ Քննչական կոմիտեի Telegram ալիքը:

«Քննությունը պարզել է, որ ոչ ուշ, քան 2022 թվականի ապրիլի 6-ը, Ասկերովը Facebook սոցցանցի իր էջին դիտավորյալ կեղծ տեղեկատվություն է հրապարակել՝ վիրավորելով եւ վարկաբեկելով մեծն ռուս հրամանատար եւ հայրենիքի պաշտպան, Խորհրդային Միության մարշալ Գեորգի Կոնստանտինովիչ Ժուկով հիշատակը»,- ասվում է հաղորդագրության մեջ։

Այդ կապակցությամբ Ասկերովի նկատմամբ հետաքննվում է ՌԴ քրեական օրենսգրքի 354.1-րդ հոդվածի 4-րդ մասով նացիզմի ռեաբիլիտացման փաստով հարուցված քրեական գործը։ Եթե ​​Ասկերովին մեղավոր ճանաչեն, նրան մինչեւ 5 մլն ռուբլի տուգանք կամ  մինչեւ հինգ տարի ազատազրկում է սպառնում:
Turan-ը գրում է, որ «Ասկերովի էջին Ժուկովի մասին որեւէ նշված ամսաթվին, դրանից առաջ եւ հետո Ժուկովի մասին որեւէ գրառում չկա»։ «Միեւնույն ժամանակ Ասկերովի էջին նացիստական ​​Գերմանիայի հետ պատմական անալոգիաներ եւ  համեմատություններ, ռուսական հեռուստատեսության եւ դրա քարոզիչների միջակության մասին բազմաթիվ բացասական ակնարկներ կան։ Նա նաեւ ծաղրում է Z տառի օգտագործումը ռուսական քարոզչության կողմից եւ մարգարեական է անվանում նացիստական ​​Z տառով խորտակված նավի մասին մուլտֆիլմը: Գրառումներից մեկում Ասկերովը քննադատում է ՌԴ Պետդումային Երկրորդ համաշխարհային պատերազմի ժամանակ ԽՍՀՄ-ի եւ նացիստական ​​Գերմանիայի դերի հանրային նույնականացման պատասխանատվության մասին Վարչական իրավախախտումների մասին օրենսգրքում փոփոխությունների համար:

Ռովշան Ասկերովն Ադրբեջանի եւ Ռուսաստանի քաղաքացի է, հիմնականում բնակվում է Մոսկվայում, որտեղ «Բաքու» ամսագրի տնօրենն է։ Այդ պարբերականի գլխավոր խմբագիրը Հեյդար Ալիեւի Հիմնադրամի փոխնախագահ Լեյլա Ալիեւան է։