նախընտրելի դարձնել
Քաղաքական իշխանությունը բավականին ծանր դրության մեջ է դրել ոստիկանությանը. Այստեղ կանգնած ոստիկաններից շատերը կորցրած ընկերներ ունեն, գիտակցում են, թե ինչ է հայրենիքի կորուստը, բայց քաղաքային իշխանությունը տարբեր գործիքներ է կիրառում, որպեսզի նրանց բավականին ծանր իրադրության մեջ դնի: Այս մասին, այսօր՝ մայիսի 3-ին, լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը, ով Նիկոլ Փաշինյանի հրաժարականը պահանջող քաղաքացիների հետ այսօր փակել է Երևան-Արարատ մայրուղին։
Նրա խոսքով, ոստիկանները շուտով, ուզեն, թե չուզեն, համալրելու են բողոքի ելած քաղաքացիների շարքերը. «Քիչ չեն գիտակից մարդիկ, ովքեր գիտեն, որ այս իշխանությունների պետության ղեկին մնալն ինչ հետևանքների է հանգեցնելու»։
Տ.Աբրահամյանը նշեց, որ բոլորը պետք է գիտակցեն այն սպառնալիքները, որոնք կախված են Հայաստանի ու Արցախի գլխին։
«Հատուկ ընդգծեմ, որ խնդիրը միայն Արցախը չէ։ Այն վտանգը, որ այսօր կա, սպառնում է նաև Հայաստանին, Հայաստանի տարբեր բնակավայրում ապրող մեր բոլոր քաղաքացիներին»,- ասաց ընդդիմադիր գործիչը։
Նա ընդգծեց, որ իշխանությունը չունի խաղաղության օրակարգ, կա կորուստների, տապալումների, ձախողումների իրական օրակարգ, ինչն արդեն 4 տարի տեղի է ունենում։
«Այս իշխանությունն իր քաղաքականությամբ, վարքով, բնականաբար, չի կարող խաղաղություն բերել։ Դա ցույց է տվել այս 4 տարիների կյանքը, այն տարածքային ու մարդկային հսկայական կորուստները, որ ունեցել է Արցախն ու Հայաստանը»,- ասաց Տիգրան Աբրահամյանը։
Նշենք, որ վաղ առավոտից «Դիմադրության շարժման մասնակիցները կաթվածահար են արել մայրաքաղաքի մի շարք փողոցներ։ Ոստիկանները ակցիայի մասնակիցներին բերման են ենթարկում՝ բռնի ուժ կիրառելով։
Ավելի վաղ NEWS.am-ը հայտնել էր, որ մայիսի 2-ից խաղաղ անհնազանդության ակցիաներ են սկսվել Երեւանում, փակվել են մի շարք փողոցներ: Բացի այդ, փակվել են նաեւ մարզեր տանող ճանապարհներ, մասնավորապես, Սեւան-Երեւան, Վանաձոր-Երեւան մայրուղիները:
