Անհայտ մակնիշի ավտոմեքենան, սեպտեմբերի 17-ին, Լենինգրադյան փողոցում բախվել է «ՎԱԶ-21112»  մակնիշի ավտոմեքենայի, որն էլ դուրս է եկել երթեւեկելի մասից եւ բախվել ծառին:

Ոստիկանության մամուլի ծառայությունից NEWS.am-ին հայտնում են, որ «ՎԱԶ-21112»-ը վարորդը մարմնական վնասվածքներով տեղափոխվել է հիվանդանոց:Կատարվում է քննություն:

Նույն վթարի կապակցությամբ, Հայաստանի ԱԻՆ փրկարար ծառայությունն ավելի մանրամասն տեղեկատվություն է հաղորդում:

Ըստ այդմ, նշվում է, որ սեպտեմբերի 17-ի ուշ երեկոյան ահազանգ է ստացվել, որ Երեւանի Լենինգրադյան փողոցում` «Եվրոպա» ռեստորանի մոտ տեղի է ունեցել ավտովթար:

Դեպքի վայր են մեկնել ճգնաժամային կառավարման կենտրոնի օպերատիվ խումբը (պարամեդիկով) և փրկարարական ուժերի վարչության հատուկ փրկարարական ջոկատի հերթապահ խումբը:

Դեռևս չպարզված հանգամանքներում բախվել են «ՎԱԶ 21010» մակնիշի 18 ՍԼ 053 համարանիշի եւ «ԶԻԼ» մակնիշի անհայտ համարանիշի ավտոմեքենաները («ԶԻԼ» մակնիշի ավտոմեքենան տեղում չի գտնվել): Վթարի հետեւանքով, «ՎԱԶ 21010» ավտոմեքենայի վարորդ, Երեւան քաղաքի Դավիթաշեն 3-րդ թաղամասի բնակիչ, 30-ամյա Վաղինակ Բադալյանը  ստացել է տարբեր աստիճանի մարմնական վնասվածքներ: Փրկարարները ավտոմեքենայից դուրս են բերել տուժածին: Վ.Բադալյանը տեղափոխվել է «Արմենիա» բժշկական կենտրոն:   

Տուժածի առողջական վիճակը գնահատվել է միջին ծանրության: