Կիրակի՝ մայիսի 28-ին, Թուրքիայում,երկրի պատմության մեջ առաջին անգամ, անցկացվում է նախագահական ընտրությունների երկրորդ փուլը, տեղեկացնում է Անադոլուն։

Ընտրատեղամասերը բացվել են տեղական ժամանակով 08։00-ին և փակվելու են 17։00-ին։

Ամբողջ երկրով մեկ տեղադրվել է ավելի քան 191 հազ․ քվեատուփ։ Ընտրողների թիվը գերազանցում է 60 մլն-ը։

Մայիսի 14-ի առաջին փուլի քվեարկության արդյունքներով թեկնածուներից ոչ մեկը ձայների 50 տոկոսը չէր հավաքել, իսկ երկրորդ փուլ դուրս գալու իրավունքը ստացել էին «Ժողովրդի միության» թեկնածու, գործող նախագահ Ռեջեփ Թայիփ Էրդողանը (49,52%) և «Ազգի միության» թեկնածու, Հանրապետական ժողովրդական կուսակցության առաջնորդ Քեմալ Քըլըչդարօղլուն (44,88%)։

«ԱԹԱ դաշինքի» թեկնածու Սինան Օհանը, որը մայիսի 14-ի քվեարկությանը հավաքել էր ընտրողների ձայների 5,17%-ը, իր  կողմնակիցներին կոչ է արել պաշտպանել Էրդողանի թեկնածությունը։

Ձայների հաշվումը սկսվելու է տեղական ժամանակով 17։00-ին ընտրատեղամասերը փակվելուց հետո։

Այն ընտրողների համար, որոնք առողջական պատճառներով չեն կարող ընտրատեղամասեր գալ, գործելու են «շարժական քվեատուփեր»։

Ինչպես մայիսի 14-ի ընտրություններին, տեսողության խնդիրներ ունեցող անձինք, կարող են քվեարկել հատուկ պատրաստված շաբլոնով։

Արտասահմանում ապրող Թուրքիայի քաղաքացիների քվեարկությունն ավարտվել է մայիսի 24-ին։ 73 երկրում և ՀԱԿ-երում քվեարկել է ընդհանուր առմամբ 3,5 մլն ընտրող։

Քվեատուփերն արտասահմանից Անկարա են բերվել ինքնաթիռներով և դիվանագիտական փոստով։ Դրանք բացվելու են կիրակի երեկոյան, մյուս քվեատուփերի հետ միասին քվեարկության ավարտից հետո։

Ընտրությունների արդյունքների   հեռարձակման արգելքը գործելու է մինչև մայիսի 28-ի 21։00-ը։ ԿԸՀ որոշմամբ, արգելքի ժամկետը հնարավոր է օրենքով սահմանված ժամանակից շոււտ հանել։