«Թալիբան» շարժման գերագույն առաջնորդ Հիբաթուլլա Ախունդզադան կիրակի հրապարակել է հաղորդագրություն, որում պնդել է, որ իր կառավարությունը անհրաժեշտ քայլեր է ձեռնարկել Աֆղանստանում կանանց կյանքի բարելավման համար, հայտնում է Associated Press-ը:

Հիբաթուլլա Ախունդզադայի հայտարարությունը տարածվել է Իդ ալ-Ադհա (Կուրբան բայրամ) տոնի նախօրեին, որն այս շաբաթավերջին նշվելու է  Աֆղանստանում եւ այլ իսլամական երկրներում:

Իսլամի գիտակ Ախունդզադան հազվադեպ է հայտնվում հասարակության առջեւ եւ  Աֆղանստանի հարավային Քանդահար նահանգի սահմանները չի լքում: Նա իրեն շրջապատում է այլ կրոնական  գիտնականներով եւ աջակիցներով, որոնք դեմ են կանանց կրթությանը եւ աշխատելուն:

Իր ուղերձում Ահունդզադան հայտարարել է, որ Իսլամական էմիրության կառավարման ընթացքում հատուկ միջոցներ են ձեռնարկվել  ավանդական շատ ճնշումներից կանանց փրկելու համար, ներառյալ հարկադիր ամուսնությունները, «եւ շարիաթով սահմանված նրանց իրավունքները պաշտպանվել են»:

Բացի այդ, «անհրաժեշտ քայլեր են ձեռնարկվել  հասարակության կեսը կազմող կանանց դրությունը բարելավելու ուղղությամբ, որպեսզի ապահովվի նրանց հարմարավետ եւ բարեկեցիկ կյանքը` իսլամական շարիաթի համաձայն»,- նշել է «Թալիբանի» գերագույն առաջնորդը:

Հաղորդագրությունը տարածվել է հինգ լեզվով` արաբերեն, դարիերեն, անգլերեն, փուշտուերեն եւ ուրդուերեն:

Ախունդզադան ասել է, որ շուտով կավարտվեն հիջաբ կրելու եւ «սխալ պահվածքի» հետ կապված նախորդ 20-ամյա օկուպացիայի բացասական կողմերը:

«Կնոջ, որպես ազատ եւ արժանավոր մարդու կարգավիճակը վերականգնված է, եւ բոլոր հաստատությունները պարտավոր են օգնել կանանց ամուսնության, ժառանգության եւ այլ իրավունքների պահպանման հարցում»,- ավելացրել է նա:

Հիշեցնենք, որ «Թալիբանը», որն Աֆղանստանում  խլել է իշխանությունը արեւմտյան զորքերի դուրսբերումից հետո, զգալիորեն սահմանափակել է կանանց իրավունքները կրթության եւ կարիերայի ոլորտներում: