Իսրայելի վարչապետ Բենիամին Նաթանյահուն կիրակի  հայտարարել է, որ ցանկանում է, որ Թել Ավիվում դաժան բախումներին մասնակցած Էրիթրեացի բոլոր ներգաղթյալներն  անհապաղ արտաքսվեն և կարգադրել է ծրագիր մշակել երկրից բոլոր աֆրիկացի ներգաղթյալներին արտաքսելու համար, հաղորդում է Associated Press-ը:

Այս հայտարարությունները հնչել են Թել Ավիվի հարավում հակառակորդ Էրիթրեական խմբերի արյունալի բողոքի ցույցերից մեկ օր անց, որոնց հետևանքով տուժել է մոտ 100 մարդ:

«Մենք ցանկանում ենք կոշտ գործողություններ ընդդեմ անկարգությունների մասնակիցների, ներառյալ նրանց անհապաղ արտաքսումը», - ասել է Նաթանյահուն նախարարների հատուկ  հանդիպմանը, որը հրավիրվել էր բռնության հետևանքների դեմ պայքարելու համար: Նա նախարարներից պահանջել է իրեն ներկայացնել «բոլոր մյուս անօրինական ներթափանցողներին վտարելու» ծրագրերը և իր ելույթում նշել, որ Գերագույն դատարանը չեղյալ է համարել ներգաղթյալներին հեռանալ հարկադրելու որոշ միջոցներ:

Միջազգային իրավունքի համաձայն, Իսրայելը չի ​​կարող ներգաղթյալներին բռնի ուժով հետ ուղարկել մի երկիր, որտեղ նրանց կյանքը կամ ազատությունը կարող է վտանգված լինել։

Նաթանյահուն կիրակի ասել է, որ չի կարծում, որ Էրիթրեայի կառավարության կողմնակիցների արտաքսումը խնդիր կդառնա։

Իսրայելում ապրում է մոտ 25 000 աֆրիկացի ներգաղթյալ, հիմնականում Սուդանից և Էրիթրեայից, որոնք պնդում են, որ փախել են հակամարտությունից կամ բռնաճնշումներից: Իսրայելը շատ քչերին է ճանաչում որպես  ապաստան հայցողների՝ նրանց ճնշող մեծամասնությանը վերաբերվելով որպես տնտեսական ներգաղթյալների և ասում, որ իրավական պարտավորություններ  չունի նրանց պահելու:

Երկիրը փորձել է տարբեր մարտավարություններ, որպեսզի  ստիպի նրանց հեռանալ երկրից, այդ թվում՝ ոմանց ուղարկել է հեռավոր բանտեր, պահել նրանց աշխատավարձի մի մասը այնքան ժամանակ, մինչև նրանք կհամաձայնեն լքել երկիրը, կամ առաջարկել է կանխիկ վճարումներ նրանց, ովքեր համաձայնվել են տեղափոխվել Աֆրիկայի որևէ այլ երկիր։