Եվրամիությունը կարգելի կանխիկ վճարումները 10 հազար եվրոն գերազանցող գումարների համար։ Եվրախորհրդարանի և ԵՄ երկրների ներկայացուցիչները համապատասխան պայմանավորվածություն են ձեռք բերել փողերի լվացման դեմ պայքարի վերաբերյալ։

Օրենքն ուժի մեջ կլինի ԵՄ բոլոր երկրներում և պետք է փակի ազգային օրենսդրության մնացած բացերը, հայտնում է DW-ն։ Բացի այդ, շքեղ ապրանքներ վաճառողներից կպահանջվի ստուգել իրենց հաճախորդների ինքնությունը և կասկածելի գործարքների մասին հայտնել իշխանություններին: Ավելի խիստ կանոններ կկիրառվեն զարդերի, շքեղ մեքենաների, մասնավոր ինքնաթիռների և զբոսանավերի վաճառքի համար։ 

Բացի այդ, ԵՄ իշխանությունները ստիպված կլինեն ավելի ուշադիր հետևել կրիպտոարժույթներով գործարքներին և 50 միլիոն եվրոյից ավելի ակտիվներ ունեցող գերհարուստ մարդկանց բանկային գործարքներին: Ընկերությունների սեփականատերերը, ովքեր ունեն բաժնետոմսերի առնվազն մեկ քառորդը, ենթակա կլինեն գրանցման ողջ ԵՄ-ում: Այս միջոցները, մասնավորապես, ուղղված են ռուս օլիգարխներին ԵՄ պատժամիջոցները շրջանցելու հնարավորությունից զրկելուն։

Եվրախորհրդարանի գլխավոր բանակցող Էերո Հեյնալուոմայի խոսքով՝ կրիպտոարժույթների, բանկերի, ինչպես նաև օլիգարխների և ֆուտբոլային ակումբների միջոցով փողերի լվացման դեմ պայքարի կանոնների խստացումը «վաղուց հասունացել է», և ԵՄ-ում միասնական չափանիշները պետք է փակեն ազգային օրենսդրության բացերը։ 

Ինչպես ենթադրվում է, որ նոր կանոնն ուժի մեջ կմտնի 2029 թվականին։ Դրա հսկողության համար պատասխանատվությունը կրելու են ազգային իշխանությունները՝ փողերի լվացման դեմ պայքարի եվրոպական նոր մարմնի (Amla) հետ համաձայնեցված: Որոշումը, թե որտեղ է գտնվելու նրա շտաբ-բնակարանը, կկայացվի 2024 թվականին։ Գերմանիան առաջարկում է այս բաժանմունքը տեղակայել Մայնի Ֆրանկֆուրտում։