Մայիսի 14-ին Երեւանում մեկնարկել է Վերակառուցման եւ զարգացման եվրոպական բանկի (ՎԶԵԲ) ամենամյա ժողովը։

Միջոցառման շրջանակում, որը տեւելու է մինչեւ մայիսի 16-ը, տեղի կունենա ՎԶԵԲ բիզնես-համաժողովը։

Հայաստանի համար աննախադեպ միջոցառումը ֆինանսական ոլորտում մեկ տանիքի տակ կհավաքի մոտ 2 000 մասնակցի, այդ թվում 74 երկրների պաշտոնական պատվիրակությունների, միջազգային կազմակերպությունների եւ մասնավոր հատվածի կազմակերպությունների բարձրաստիճան ներկայացուցիչների։

Ամենամյա հանդիպման մաս կկազմի նաեւ բիզնես-համաժողովը, որը կրելու է «Delivering Impact Together» անվանումը։

ՎԶԵԲ ամենամյա հանդիպումները հնարավորություն են տալիս քննարկումներ անցկացնել այն իրադարձությունների շուրջ, որոնք տեղի են ունենում համաշխարհային ֆինանսատնտեսական միջավայրում, եւ քննարկել այն հարցերը, որոնք համընդհանուր հետաքրքրություն են ներկայացնում, իրականացնել երկկողմ հանդիպումներ պատվիրակների  եւ միջազգային կազմակերպությունների, օտար երկրների եւ այլ կազմակերպությունների ներկայացուցիչների հետ։

Նիստի շրջանակում տեղի կունենան լիագումար նստաշրջաններ, կամփոփվեն վերջին մեկ տարվա աշխատանքի արդյունքները, կնախատեսվեն ապագա խնդիրները։

ՎԶԵԲ ամենամյա հավաքը եւ բիզնես-համաժողովը հավաքում է ՎԶԵԲ բարձրաստիճան պաշտոնյաներին, ֆինանսական աշխարհի ներկայացուցիչներին եւ բիզնեսի առաջնորդներին՝ քննարկելու եւ լուծելու համար գլոբալ ֆինանսական խնդիրները։

Այս տարի ՎԶԵԲ-ը կենտրոնանալու է երեք կարեւոր թեմաների վրա՝ ներառականություն, թվայնացում եւ կանաչ անցում։

Այս թեմաներից յուրաքանչյուրը արտացոլում է ՎԶԵԲ առաքելության էությունը եւ արդի բիզնեսի եւ զարգացման փոփոխվող պատկերը։

Ի՞նչ է ներառականությունը։ Մարդկանց հավասար իրավունքի տրամադրում հաջողության հասնելու համար՝ նրանց հմտությունների եւ տաղանդի առավել արդյունավետ օգտագործմամբ. սա է բանկի մոտեցման բանալին աճի եւ բարգավաճման հասնելու համար այն երկրներում, որոնցում այն իրականացնում է իր գործունեությունը։

Թվայնացման շեշտադրումը արտացոլում է հնարավորությունների եւ խնդիրների բազմությունը, որոնք առաջանում են արագ տեխնիկական առաջընթացի արդյունքում։ Թվային աշխարհի վերափոխող ուժը բիզնեսում, ֆինանսներում եւ ընդհանրապես հասարակությունում անտեսել չի կարելի։

Կանաչ տնտեսության անցումը բանկի նոր մոտեցումն է այն երկրներին օգնելու հարցում, որոնցում աշխատում է ՎԶԵԲ-ը, կանաչ, ցածր ածխածնային եւ կայուն տնտեսություն կառուցելու համար։ Կանաչ անցումը նշանակում է անցում այն տնտեսությանը, որը հիմնված չէ հանածո վառելիքի եւ բնական պաշարների չափից ավելի օգտագործման վրա։ Կայուն տնտեսությունը հենվում է ցածր ածխածնային լուծումների վրա, որոնք նպաստում են փակ ցիկլի տնտեսության եւ կենսաբազմազանության զարգացմանը։

Առաջատար բանկը Հայաստանում, որն առաջարկում է դիվերսիֆիկացիոն համընդհանուր բանկային ծառայություններ, «Արդշինբանկը», կազմակերպել է տնտեսական եւ առեւտրային պատժամիջոցների, առաջացող խնդիրների եւ դրանց լուծման հնարավոր միջոցների քննարկումը։ Պանելային բանավեճը կանցկացնի «Արդշինբանկի» վարչության անդամ, ռիսկերի կառավարման գծով տնօրեն Լուսինե Ներսիսյանը։