ՆախընտրելիՀայաստանյան մի շարք իրավապաշտպան կազմակերպություններ պահանջել են դադարեցնել «Չորրորդ իշխանություն» թերթի նկատմամբ հետապնդումը:
Հիշեցնենք, որ նոյեմբերի 10-ին «Չորրորդ իշխանություն» օրաթերթը լույս չի տեսել՝ դատարանի կայացրած ապօրինի վճռի պատճառով: Դրա փոխարեն կրպակներում հայտնվել է ձեւավորմամբ ու բովանդակային ուղղվածությամբ նույնական «Չորրորդ ինքնիշխանություն» թերթը:
"Իսկ ընթերցող լսարանին հայտնի անունով թերթի տպագրությունը դադարեցնելու համար հիմք է ծառայել Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Խանդանյանի որոշումը, որում նշված է՝ «արգելել „Չորրորդ իշխանություն“ օրաթերթի տպագրությունը ինչպես „Կողմնակի անձանց Մ“ ՍՊ ընկերության, այնպես էլ ցանկացած այլ ընկերության կողմից, որեւէ այլ տպարանում»: Այս որոշման հիման վրա ԴԱՀԿ-ը կատարողական վարույթ է հարուցել: Նման որոշման առիթ է հանդիսացել տնտեսական վեճը «Գինդ» տպագրատան եւ «ՉԻ» հրատարակիչ (լրատվական գործունեություն իրականացնող) «Օգոստոս» գործակալության միջեւ",- նշում են իրավապաշտպաններն ու հավելում. «Մենք՝ հասարակական կազմակերպությունների ներկայացուցիչներս, համարում ենք, որ թերթի տպագրության արգելմամբ խախտվել է տեղեկատվության ազատ տարածման սկզբունքը: Նման որոշումը, ինչ պատճառաբանությամբ էլ այն կայացված լինի, հակասում է ՀՀ Սահմանադրության 27-րդ եւ „Մարդու իրավունքների եւ հիմնարար ազատությունների պաշտպանության մասին“ Եվրոպական կոնվենցիայի 10-րդ հոդվածներին»:
Ելնելով վերոհիշյալից՝ հայտարարության հեղինակները պահանջում են «չեղյալ համարել ժողովրդավարության սկզբունքներին հակասող դատական որոշումը, դադարեցնել „Չորրորդ իշխանություն“ թերթի նկատմամբ հետապնդումը եւ ֆինանսական խնդիրները լուծել համապատասխան հարթության վրա»: Հայտարարության տակ ստորագրել են «Խոսքի ազատության պաշտպանության կոմիտե»-ն, Երեւանի մամուլի ակումբը, ԶԼՄ-ների աջակցության «Ինտերնյուս» ՀԿ-ն, լրագրողների «Ասպարեզ» ակումբը, Վանաձորի մամուլի ակումբը, «Թրանսփարենսի ինթերնեշնլ» հակակոռուպցիոն կենտրոնը, «Հայաստանի հելսինկյան կոմիտե»-ն:
