Կիեւի Շեւչենկովյան շրջանի դատարանը կրկնակի ձերբակալել է Ուկրաինայի նախկին վարչապետ  Յուլիա Տիմոշենկոյին` «Ուկրաինայի միացյալ էներգետիկ համակարգեր» կորպորացիան ղեկավարելու տարիներին գործած մեքենայությունների մեղադրանքով:

Հիշեցնենք, որ Տիմոշենկոյին գազային գործով արդեն մեղադրել էին,  եւ նա բանտում է: Նրա կրկնակի ձերբակալման հարցը քննարկվել է հենց նախկին վարչապետի մենախցում,  դատարանի արտահերթ նիստում եւ տեւել է 12 ժամ: Դատարանն ինքն է բանտ եկել Յուլիա Տիմոշենկոյի վատ ինքնազգացողության պատճառով, որը գրեթե ամբողջ ժամանակ գամված է անկողնուն, գրում է utro.ru-ն

Ինչպես լրագրողներին տեղեկացրել է նախկին վարչապետի փաստաբան Սերգեյ Վլասենկոն, իր պաշտպանյալը հինգ անգամ գանգատվել է վատ ինքնազգացողությունից, երկու անգամ բժիշկ են կանչել,  բայց դատարանի նիստը չի ընդհատվել:

Արդյունքում դատարանը վճռել է 2 ամսով կրկնակի բանտարկել Տիմոշենկոյին: Վլասենկոյի խոսքով` դատարանը կայացրել է  այս վճիռը` զգուշանալով, որ ազատության մեջ գտնվելու դեպքում  նախկին վարչապետը կարող է ազդել քննության ընթացքի վրա: Ընդ որում, դատարանն անտեսել է այն փաստը, որ Տիմոշենկոն արդեն իսկ բանտում է:

Հիշեցնենք, ըստ Ուկրաինայի հարկային ծառայության տվյալների` 1990-ական թվականների կեսերին` «Ուկրաինայի միացյալ էներգետիկ համակարգեր» կորպորացիան ղեկավարելու տարիներին, Տիմոշենկոն մեքենայությունների շնորհիվ թաքցրել է 165 մլն դոլար եւ խուսափել  է 5,8 մլն դոլարի  հարկ վճարելուց: