նախընտրելի դարձնել
2024 թվականի նոյեմբերի 11-ից 15-ը Դուբայի Արբիտրաժային շաբաթն (Dubai Arbitration Week, DAW) իր շուրջը համախմբեց արբիտրաժային ոլորտի մասնագետների, արբիտրաժային հաստատությունների ներկայացուցիչների և այլ մասնագետների ամբողջ աշխարհից։ Ավելի քան 140 միջոցառումներով և ավելի քան 50 երկրներից ժամանած մասնակիցներով այս տարին DAW-ի պատմության մեջ ամենածավալունն էր։ Միջոցառման կազմակերպիչներն էին Դուբայի Միջազգային Արբիտրաժային Կենտրոնը (DIAC), տեղական և միջազգային մի շարք գործընկերներ, ովքեր այս հարթակը դարձրել են գլոբալ նշանակության հանդիպման կետ։
Հայաստանի մասնակցությունը Դուբայի Արբիտրաժային շաբաթին
Արբիտրաժի և հաշտարարության հայաստանյան կենտրոնի (AMCA) ակտիվ ներգրավվածությունը DAW-ում կարևորեց Հայաստանի դերը և նպաստեց նրա միջազգային ներկայությանը։ Միջոցառմանը մասնակցում էին AMCA տնօրեն Տաթևիկ Մատինյանը, փոխտնօրեն Լիլիթ Պետրոսյանը և հանրային կապերի պատասխանատու Վարդան Լաբլաջյանը։ Նրանք կենտրոնի նպատակներն ու գործառույթները ներկայացրեցին կազմակերպիչներին և մասնակիցներին, ինչը կարևոր քայլ էր երկկողմ հարաբերությունների ամրապնդման և նոր համագործակցությունների ձևավորման համար։
Հանդիպումներ և քննարկումներ միջազգային մակարդակում
DAW-ի ընթացքում Տաթևիկ Մատինյանը հատուկ հանդիպում ունեցավ Դուբայի Միջազգային Արբիտրաժային Կենտրոնի գործադիր տնօրեն Ջեհադ Աբդուլռազզաք Քազիմի հետ։ Հանդիպման հիմնական թեմաները կենտրոնացան Հայաստանում և տարածաշրջանում արբիտրաժի զարգացման և կանանց դերի ամրապնդման շուրջ։ Մատինյանը ներկայացրեց AMCA-ի՝ միջազգային հաբ դառնալու նպատակները և առաջարկեց համատեղ ծրագրեր DIAC-ի հետ։ Տիկին Մատինյանը տիկին Քազիմին հրավիրեց Հայաստան՝ որպես բանախոս, հանդես գալու և կիսվելու իր փորձով հայաստանյան մասնագետների հետ։ Այս հրավերը կարևոր է արբիտրաժային ոլորտի ընդլայնման համար, քանի որ DIAC-ի հետ համագործակցությունը կարող է մեծապես նպաստել Հայաստանի՝ տարածաշրջանային արբիտրաժային կենտրոն դառնալու ճանապարհին։
DAW 2024-ի կարևորության և քննարկված թեմաների մասին
DAW 2024-ի օրակարգը ներառում էր մի շարք թեմաներ, որոնք ուղղված էին արբիտրաժային ոլորտի նորարարություններին և արդիականացմանը։ Միջոցառման առաջին օրը բացման խոսքով հանդես եկան DIAC-ի ղեկավար կազմը՝ ընդգծելով արբիտրաժային համակարգում իրավական արդյունավետության և միջազգային համագործակցության կարևորությունը։ Խոսնակներից մի քանիսը նշեցին, որ «DAW-ը դարձել է մի հարթակ, որտեղ միջազգային կազմակերպությունները և ոլորտի առաջատար մասնագետները կիսում են իրենց փորձը՝ նպաստելով համաշխարհային արբիտրաժային պրակտիկայի ձևավորմանը»։
Միջոցառման թեմաներից հատկապես առանձնանում էին․
- Արբիտրաժի դերը տարածաշրջանային համագործակցությունում՝ շեշտադրելով, որ Մերձավոր Արևելքում և հարակից տարածաշրջաններում արբիտրաժային լուծումների արդյունավետությունը կարևոր է տնտեսական և ներդրումային միջավայրի համար։
- Թվային արդիականացում և արհեստական ինտելեկտի ներգրավում արբիտրաժում, որը մեծացնում է գործարքների արդյունավետությունը և հնարավորություն տալիս նոր մեթոդներ կիրառելու։
- Կանանց դերի ընդլայնումը արբիտրաժային պրակտիկայում, որտեղ անդրադարձ կատարվեց ոլորտում կանանց ներգրավման և նրանց առաջնորդական դերի կարևորությանը, ինչը հատկապես նշվեց նաև Տաթևիկ Մատինյանի և Ջեհադ Աբդուլռազզաք Քազիմի հանդիպման ժամանակ։
-Միջազգային ներդրումային վեճերի լուծման մեխանիզմները՝ զարկ տալով ներդրումների պաշտպանության գործընթացների զարգացմանը։
Արբիտրաժի և հաշտարարության հայաստանյան կենտրոնի ձեռքբերումները
Տիկին Մատինյանի, տիկին Պետրոսյանի և Վարդան Լաբլաջյանի ջանքերով AMCA-ի՝ որպես հուսալի գործընկեր և տարածաշրջանային հարթակի դերի կարևորությունը արժանացավ դոնորների և միջազգային կազմակերպությունների ուշադրությանը։ Միջազգային գործընկերների հետ հաստատված կապերը և երկկողմ առաջարկությունները վկայում են այն մասին, որ Հայաստանը կարող է դառնալ ոչ միայն տարածաշրջանային, այլև միջազգային հարթակ՝ ապահովելով արբիտրաժային ոլորտում վստահություն և վստահելիություն։
DAW-ը, հանդիսանալով բազմաբնույթ փորձի փոխանակման հարթակ, Արբիտրաժի և հաշտարարության հայաստանյան կենտրոնին հնարավորություն է տվել սերտորեն կապ հաստատել միջազգային առաջատար գործընկերների հետ, ինչպես նաև զարգացնելու Հայաստանի արբիտրաժային դիրքը՝ նպաստելով երկրի հեղինակության ամրապնդմանը միջազգային մակարդակում։
