նախընտրելի դարձնել
Դանիայի կառավարությունը հայտարարել է Ուկրաինային 292 միլիոն դոլարի ռազմական օգնության նոր փաթեթի մասին։
Ինչպես հայտնում է BBC-ն՝ այդ գումարը կօգտագործվի, մասնավորապես, այլ երկրների կողմից Ուկրաինային հակաօդային պաշտպանության համակարգեր մատակարարելու և F-16 ինքնաթիռների սպասարկման համար։
«Ուկրաինայի ամենահրատապ կարիքներից մեկը պաշտպանությունն է ռուսական հրթիռներից և անօդաչու սարքերից։ Ուստի մենք առաջնահերթություն ենք տվել հակաօդային պաշտպանության ոլորտում լրացուցիչ օգնությանը»,- ըստ Դանիայի ՊՆ մամուլի ծառայության՝ նշել է նախարար Տրոելս Լունդ Պոուլսենը։
Բացի հակաօդային պաշտպանության համակարգերից և F-16 ինքնաթիռների սպասարկումից, նոր փաթեթից գումարը կծախսվի Շվեդիայի հետ CV90 հետևակի մարտական մեքենաների համատեղ մատակարարումների վրա, որոնց թիվը չի նշվում մամուլի հաղորդագրության մեջ։ Մեծ պատերազմի սկզբից Դանիան Ուկրաինային 7,3 միլիարդ դոլարի օգնություն է տրամադրել։
