Բրազիլիայի ֆինանսների նախարար Ֆերնանդո Հադադը չորեքշաբթի հայտարարել է, որ հարավամերիկյան երկիրը անմիջապես չի պատասխանի ԱՄՆ-ի կողմից պողպատի և ալյումինի ներմուծման մաքսատուրքերին և փոխարենը կձգտի բանակցություններ վարել, հայտնում է Reuters-ը։

Պողպատի և ալյումինի ներմուծման ԱՄՆ բոլոր սահմանափակումները ուժի մեջ են մտել չորեքշաբթի:

Բրազիլիան Միացյալ Նահանգների պողպատի ներմուծման ամենամեծ աղբյուրներից մեկն է, և նախագահ Լուիս Ինասիո Լուլա դա Սիլվան ավելի վաղ առաջարկել էր, որ իր կառավարությունը կարող է բողոք ներկայացնել Առևտրի համաշխարհային կազմակերպություն կամ հարկեր դնել ամերիկյան ապրանքների վրա՝ ի պատասխան ԱՄՆ սահմանած մաքսատուրքերի:

Բայց այժմ նա իր տնտեսական թիմին կարգադրել է երկխոսություն փնտրել ԱՄՆ նախագահ Դոնալդ Թրամփի վարչակազմի հետ, Բրազիլիայում պողպատի արդյունաբերության տեղական ներկայացուցիչների հետ հանդիպումից հետո լրագրողներին ասել է Հադադը:

«Նախագահ Լուլան մեզ խորհուրդ տվեց հանգստություն պահպանել՝ նշելով, որ նախկինում մենք բանակցել ենք նույնիսկ ավելի անբարենպաստ պայմաններում, քան հիմա»,- նշել է նախարարը։

Բրազիլիայի փոխնախագահ Ջերալդո Ալկմինն անցյալ շաբաթ բանակցություններ է վարել ԱՄՆ առևտրի նախարար Հովարդ Լաթնիկի հետ ԱՄՆ մաքսային քաղաքականության շուրջ, որը նրա գրասենյակը բնութագրել է որպես «դրական»:

Կողմերը պայմանավորվել են շարունակել երկու երկրների կառավարությունների միջև սկսված երկխոսությունը։