նախընտրելի դարձնել
ԱՄՆ նախագահ Դոնալդ Թրամփի վարչակազմը հեռացրել է Հեղինակային իրավունքի բյուրոյի ղեկավար Շիրա Փերլմութերին, հայտնում է CBS News-ը՝ հղում անելով իրավիճակին ծանոթ երկու աղբյուրի։
Հեղինակային իրավունքի բյուրոյից Փերլմութերի հեռացումը տեղի է ունեցել այն բանից հետո, երբ Փերլմութերը և նրա գրասենյակը հրապարակել են արհեստական բանականության վերաբերյալ ընդարձակ զեկույցի երրորդ մասը, որում նրանք որոշ մտահոգություններ և հարցեր են բարձրացրել արհեստական բանականության տեխնոլոգիայի միջոցով հեղինակային իրավունքով պաշտպանված նյութերի օգտագործման վերաբերյալ։
«Սակայն բաց է մնում այն հարցը, թե որքան տվյալներ են պահանջվում արհեստական բանականության մշակողին, և թե ինչպես է տվյալների ծավալի աննշան ավելացումն ազդում մոդելի հնարավորությունների վրա,- ասվում է զեկույցում։- Ոչ բոլորն են համաձայն, որ տվյալների ծավալի և թեստավորման արտադրողականության հետագա ավելացումը պարտադիր կերպով կհանգեցնի իրական աշխարհում օգտակարության հետագա բարձրացմանը»։
Փերլմութերը այս պաշտոնը զբաղեցնում էր 2020 թվականի հոկտեմբերից՝ Թրամփի առաջին վարչակազմի օրոք։
Նրան այդ պաշտոնում նշանակել էր Կոնգրեսի գրադարանի այժմ արդեն նախկին գրադարանավար Կառլա Հեյդենը, որին հինգշաբթի օրը հեռացրել էր նախագահ Թրամփը։
ԱՄՆ Հեղինակային իրավունքի բյուրոն, որի աշխատակազմում մոտ 450 մարդ կա, Կոնգրեսի գրադարանի ստորաբաժանումն է։ Նրա խնդիրների մեջ, ի թիվս այլոց, մտնում է հեղինակային իրավունքի հայտերի գրանցումը, հեղինակային իրավունքի սեփականատերերի մասին տեղեկատվության գրանցումը և հեղինակային իրավունքի օրենսդրության կառավարումը։
