նախընտրելի դարձնել
Գիտնականները պարզել են, որ ձիերը միմյանց հետ շփվելիս դեմքի տարբեր արտահայտություններ ունեն։
Նոր աշխատանքը ենթադրում է, որ ձիերն ավելի շատ ազդանշաններ են տալիս, որոնց անհրաժեշտ է ուշադրություն դարձնել:
«Ձիերն ունեն դեմքի արտահայտությունների հարուստ և բարդ «խաղացանկ», և մենք չպետք է անտեսենք դրանց նրբերանգները, եթե ուզում ենք իսկապես հասկանալ ձիերի սուբյեկտիվ ապրումները», -ասում է Պորտսմութի համալսարանի դոկտոր, հետազոտության առաջին հեղինակ Քեյթ Լյուիսը։
Peer J հանդեսում հրապարակված հոդվածում Լյուիսը և նրա գործընկերները հայտնում են, որ նրանք այլ մոտեցում են ցուցաբերել՝ հիմնվելով ձիերի դիմախաղի շարժումների առկա ուղեցույցի վրա, որը հայտնի է որպես «Ձիերի դեմքի գործողությունների կոդավորման համակարգ» (EquiFACS), որպեսզի նույնականացնեն 36 ընտանի ձիերի դեմքի արտահայտությունների և վարքագծի համադրությունները տարբեր տեսակի բնական փոխազդեցությունների ընթացքում։ Թիմը նրանց դասակարգել է որպես բարեկամական, ժիր, ագրեսիվ կամ ուշադրություն գրավող։
Գիտնականների մի խումբ վերլուծել է 72 ժամ տևողությամբ տեսանյութեր՝ պարզելու համար, թե յուրաքանչյուր դեպքում դիմախաղի որ շարժումներն են առավել հաճախ կրկնվում։
Թեև հետազոտողները պարզել են, որ ձիերի մռութի գրեթե բոլոր շարժումները տեղի են ունեցել բազմազան համատեքստերում, դրանիցի մի քանիսն ավելի բնորոշ էին որոշակի տեսակի փոխազդեցությունների համար:
Մասնավորապես, գիտնականները պարզել են, որ այլ ձիերի հետ բարեկամական, խաղաղ փոխազդեցությունների ժամանակ կենդանիները հակված էին քիթն առաջ ձգելուն։ Ընդհակառակը, երբ ձիերը ուշադրություն էին դարձնում ինչ-որ բանի, նրանք հակված էին ականջներն առաջ ձգել և իրար սեղմել։
Ագրեսիվ բախումների ժամանակ ականջները սովորաբար սեղմվում էին և ուղղվում դեպի ետ, մինչդեռ հոնքերի ներքին ակոսները բարձրացած էին, ռունգերը՝ լայնացած, իսկ գլուխը՝ իջեցված։ Խաղի ընթացքում ստորին շրթունքը հաճախ իջնում էր, դունչի ստորին մասը՝ բարձրանում, շրթունքները բացվում էին, բերանը լայն բացվում, իսկ ականջները շրջվում ու ետ սեղմվում։
Բացի դրանից, գիտնականների թիմը նշել է, որ խաղալիս ձիերի աչքերի սպիտակուցները հաճախ ավելի մեծ էին, քիթն առաջ մղված, իսկ գլուխները սովորաբար բարձրացրած կամ աջ շրջած, կամ թե՛ մեկը, թե՝ մյուսը:
