ԵՄ երկրները, ամենայն հավանականությամբ, չեն հասցնի մինչեւ G7-ի գագաթաժողովը, որը տեղի կունենա Կանադայի Ալբերտա նահանգում հունիսի 15-17-ը, նախապատրաստել հակառուսական պատժամիջոցների 18-րդ փաթեթը, ինչպես ակնկալում էր ԱՄՆ-ը։ Այս մասին հայտնել է EUObserver պորտալը՝ հղում կատարելով եվրոպացի դիվանագետներին։

«Մենք նույնիսկ չենք ստացել [պատժամիջոցների] 18-րդ փաթեթի իրավական տեքստերը, ուստի երկու շաբաթում համաձայնության հասնելը բավական հավակնոտ է թվում»,- պորտալը մեջբերել է դիվանագետներից մեկի խոսքերը։

Այլ աղբյուրներ ենթադրել են, որ նոր պատժամիջոցների փաթեթը կարող է պատրաստ չլինել մինչեւ ամսվա վերջ, ԵՄ դեսպանները պատրաստվում են քննարկել ԱՄՆ նախաձեռնությունը հունիսի 4-ին Բրյուսելում կայանալիք փակ հանդիպման ժամանակ։

Ինչպես նշել է պորտալը, ԱՄՆ սենատորների առաջարկած Ռուսաստանի դեմ պատժամիջոցների մասին օրինագիծը կարող է վնաս հասցնել նաեւ եվրոպական երկրներին, քանի որ այն առաջարկում է 500 տոկոս մաքսատուրք սահմանել ԱՄՆ-ում ներմուծման վրա Ռուսաստանից գազ գնող երկրներից ։

ԱՄՆ-ում Ռուսաստանի դեմ պատժամիջոցները խստացնելու մասին օրինագիծը մշակվել է սենատորներ Լինդսի Գրեմի (հանրապետական Հարավային Կարոլինայից, ընդգրկված է ահաբեկիչների եւ ծայրահեղականների ռուսական ցուցակում) եւ Ռիչարդ Բլումենթալի (դեմոկրատ Քոնեկտիկուտից) նախաձեռնությամբ։ Նրանց նախաձեռնությունը նախատեսում է երկրորդական պատժամիջոցներ Ռուսաստանի առեւտրային գործընկերների նկատմամբ: Սենատորների առաջարկը ներառում էր 500 տոկոս մաքսատուրք ԱՄՆ ներմուծման վրա այն երկրներից, որոնք Ռուսաստանից նավթ, գազ, ուրան եւ այլ ապրանքներ են գնում: Ավելի վաղ Գրեմը վստահություն էր հայտնել, որ Կոնգրեսի վերին պալատը այս շաբաթ կսկսի աշխատել օրինագծի վրա։ Բացի այդ, նա ենթադրել էր, որ Ներկայացուցիչների պալատում կլինեն օրենսդիրներ, որոնք պատրաստ կլինեն աշխատել նմանատիպ փաստաթուղթը հաստատելու ուղղությամբ։

Եվրահանձնաժողովի ղեկավար Ուրսուլա ֆոն դեր Լյայենն ավելի վաղ հայտնել էր, որ ԵՄ-ն աշխատում է Ռուսաստանի դեմ պատժամիջոցների 18-րդ փաթեթի վրա, որը կներառի նավթի վերաբերյալ միջոցառումներ, գնի շեմի իջեցում եւ այսպես կոչված ստվերային նավատորմի դեմ նոր սահմանափակումներ։