ԲՐԻՔՍ-ին նվիրված համաժողովին մասնակցած 14 ռուսաստանցի գիտնականների խումբը տարհանվել է իրանա-իսրայելական հակամարտության գոտուց։ Այս մասին РИА Новости-ին հայտնել են ՌԴ Գիտության և բարձրագույն կրթության նախարարությունից։

«ԲՐԻՔՍ-ին նվիրված ռուս-իրանական համաժողովին մասնակցած 14 ռուսաստանցի գիտնական-միջազգայնագետներից բաղկացած խումբը բարեհաջող տարհանվել է իրանա-իսրայելական հակամարտության գոտուց»,- ասված է հաղորդագրության մեջ։

Ճշտվում է, որ պատվիրակության կազմում են եղել ՌԴ Գիտության և բարձրագույն կրթության նախարարության ենթակա կազմակերպությունների աշխատակիցներ՝ ՌԳԱ Արևելագիտության ինստիտուտի փոխտնօրեն Վասիլի Կուզնեցովը և ՌԳԱ Համաշխարհային էկոնոմիկայի և միջազգային հարաբերությունների ինստիտուտի (ՀՄՀ և ՄՀԻ) կրտսեր գիտաշխատող Եվդոկիա Դոբրևան։

«Մարտական գործողությունները սկսվելուց հետո գիտնականներին տեղափոխել են ռուսաստանյան դեսպանատան տարածք, որտեղից նրանք այսօր մեկնել են Ադրբեջան։ Ներկա պահին խումբն արդեն հատել է սահմանը, նրա անվտանգությանը ոչինչ չի սպառնում»,- հավելել են նախարարությունում։

Ըստ Կուզնեցովի, համաժողովի ծրագիրը ներառել է ԲՐԻՔՍ-ի կրթական արշավախումբ և միջազգային հարաբերությունների խնդիրներին նվիրված գիտաժողով։

«Ցավոք, այն պայմաններում, որոնցում մենք հայտնվեցինք, լարվածության կտրուկ սրման և Իրանի տարածքի ռմբակոծությունների պատճառով, ստիպված եղանք որոշակիորեն փոխել ծրագիրը և շարունակեցինք աշխատել նոր հանգամանքներում։ Այս առումով հիացմունք է պատճառում իրանցի գործընկերների տոկունությունը։ Հուսով ենք, որ իրավիճակը կփոխվի, և մենք կկարողանանք շարունակել աշխատանքը մեր իրանցի գործընկերների և բարեկամների հետ, քանի որ մենք իսկապես ունենք քննարկման և կարծիքների փոխանակման համար շատ հետաքրքիր օրակարգ»,- РИА Новости-ին պատմել է գիտնականը։