Ռուսաստանի լավագույն լիգայի՝ АСА-ի միջազգային մրցաշարում Lionheart ակումբի մարտիկները նախօրեին տպավորիչ հաղթանակից հետո թե՛ ուղիղ եթերում, թե՛ մենամարտերի ավարտից հետո անկեղծ աջակցության խոսքեր են հայտնել գործարար, «Տաշիր» ընկերությունների խմբի սեփականատեր և բարերար Սամվել Կարապետյանին, ինչպես նաև այն արժեքներին, որոնք նա պաշտպանում է, հայտնում է Alpha News-ը։

«Կցանկանայի մի քանի խոսք ասել Սամվել Կարապետյանի մասին, որը պաշտպանում է իր ժողովրդի հոգևոր արժեքները։ Հիմա նրա ազատությունը սահմանափակված է, բայց ոգին կոտրված չէ։ Ռինգում ես պայքարում եմ հաղթանակի համար, իսկ ռինգից դուրս՝ մեր ժողովրդի պատվի համար։ Ազատությո՜ւն նրանց, ովքեր պաշտպանում են իրենց հավատն ու հայրենիքը։ Ազատությո՜ւն Սամվել Կարապետյանին»,- ասել է մարտիկներից մեկը՝ բարձրաձայնելով մարզիկների շապիկներին փակցված #մեր_ձևով (#merdzevov) հեշթեգը։