Եվրախորհրդարանը հաստատել է Վրաստանի իրավիճակի վերաբերյալ կոշտ զեկույցը, որում չի ճանաչել գործող խորհրդարանի և երկրի նախագահի օրինակարգությունը։ Փաստաթղթում Վրաստանն «իշխող «Վրացական երազանք» կուսակցության անօրինական ռեժիմի զավթած պետություն» է անվանվում: Բանաձևին կողմ է քվեարկել 490 պատգամավոր, դեմ՝ 147, իսկ ձեռնպահ՝ 49, գրում է DW-ն։

Արտահերթ ընտրությունների անցկացման կոչ

Տասնամյակների ընթացքում առաջին անգամ, նշելով ժողովրդավարական ուղղությամբ նահանջ, Եվրախորհրդարանը Վրաստանում արտահերթ խորհրդարանական ընտրություններ անցկացնելու կոչ է արել։ Զեկույցում նշվում է, որ ներկա քաղաքական և սահմանադրական ճգնաժամը հաղթահարելու միակ ճանապարհն առաջիկա ամիսներին նոր ընտրությունների անցկացումն է՝ թափանցիկ և միջազգային մշտադիտարկման պայմաններում։

Առանց մուտքի վիզա ռեժիմի վերանայում

Եվրախորհրդարանի պատգամավորներն առաջարկել են վերանայել ԵՄ-ի և Վրաստանի միջև ասոցացման համաձայնագիրը և սպառնացել են կասեցնել տնտեսական համագործակցությունը և առանց վիզայի ռեժիմը, եթե ժողովրդավարական չափանիշները շարունակեն խախտվել։ Փաստաթղթում ընդգծվում է, որ հնարավոր հետևանքների պատասխանատվությունը կրում է իշխող կուսակցությունը։

Պատժամիջոցներ Իվանիշվիլիի և նրա շրջապատի նկատմամբ

Զեկույցում առանձնահատուկ ուշադրության է արժանացել նախկին վարչապետ և միլիարդատեր Բիձինա Իվանիշվիլիին, որը համարվում է իշխանության ավտորիտար կոնսոլիդացիայի գործընթացի առանցքային դեմք։ Եվրախորհրդարանը նրան, ինչպես նաև ներկա բարձրաստիճան պաշտոնյաներին, նրանց թվում՝ վարչապետ Իրակլի Կոբախիձեին, խորհրդարանի խոսնակ Շալվա Պապուաշվիլիին և Թբիլիսիի քաղաքապետ Կախա Կալաձեին, մեղադրել է երկրի եվրաինտեգրման կուրսը խաթարելու մեջ։ Այս առումով առաջարկվում է անձնական պատժամիջոցներ կիրառել, որոնց թվում՝ Իվանիշվիլիի և նրա ընկերությունների ակտիվների սառեցում։

Շրջադարձ դեպի ավտորիտարիզմ

Ինչպես նշվում է փաստաթղթում, վճռորոշ պահը 2024 թվականի հոկտեմբերն էր, երբ Վրաստանում անցկացվեցին խորհրդարանական ընտրություններ, որոնք չէին համապատասխանում ժողովրդավարական չափանիշներին։ Ըստ Եվրախորհրդարանի՝ դա «Վրացական երազանքին» հնարավորություն է տվել զավթել պետական ​​ինստիտուտները, անցկացնել բռնաճնշող օրենսդրություն և հետապնդել ընդդիմությանը, լրագրողներին և խաղաղ ցուցարարներին։