Նախընտրելի
Կոլումբիայի իշխանությունները ուրբաթ օրը հայտարարել են, որ ձերբակալել են Լատինական Ամերիկայում իտալական «Նդրանգետա» մաֆիայի ենթադրյալ առաջնորդին, որը մեղադրվում է կոկաինի առաքումները վերահսկելու և Եվրոպայում թրաֆիքինգի ուղիներ ստեղծելու մեջ, հաղորդում է Associated Press-ը։
Ոստիկանությունը կասկածյալին նույնականացրել է որպես Ջուզեպպե Պալերմո, որը հայտնի է նաև որպես «Պեպե», իտալացի, որը հետախուզվում էր Ինտերպոլի «կարմիր ծանուցագրով»՝ 196 երկրներում նրա ձերբակալման նպատակով։
Նա ձերբակալվել է Կոլումբիայի մայրաքաղաք Բոգոտայի փողոցներից մեկում՝ կոլումբիական, իտալական և բրիտանական իշխանությունների, ինչպես նաև Եվրոպոլի՝ Եվրամիության իրավապահ մարմնի կողմից համակարգված գործողության արդյունքում, ասվում է պաշտոնական հայտարարության մեջ։
Կոլումբիայի ոստիկանապետ Կառլոս Ֆերնանդո Տրիանան հայտարարել է, որ Պալերմոն համարվում է «Նդրանգետա» մաֆիայի «ամենամոտ կապեր ունեցող բջիջներից մեկի» անդամ։
«Նդրանգետան», որը Իտալիայի ամենաազդեցիկ և գաղտնի հանցավոր կազմակերպություններից մեկն է, ընդլայնել է իր ազդեցությունը արտերկրում և մեղադրվում է Եվրոպա կոկաին ներմուծելու մեջ։
«Կասկածյալը ոչ միայն ղեկավարել է մեծ քանակությամբ կոկաինի գնումը Կոլումբիայում, Պերուում և Էկվադորում, այլև վերահսկել է ծովային և ցամաքային ուղիները, որոնցով թմրանյութերը մատակարարվել են եվրոպական շուկաներ», - հավելել է Տրիանան։
Միավորված Ազգերի Կազմակերպության տվյալներով՝ 2023 թվականին կոկաինի անօրինական արտադրությունը հասել է 3708 տոննայի, ինչը գրեթե 34%-ով ավելի է նախորդ տարվա համեմատ, հիմնականում Կոլումբիայում կոկայի մշակման ընդլայնման շնորհիվ։
